Fátima Jardim substitui Zacarias Albano nu’udár Sekretaria Ezekutiva CPLP
DILI, 21 Jullu 2025 (TATOLI)—Konferénsia Xefe Estadu no Governu Komunidade Nasaun Ko’alia Lian Portugés (CPLP, sigla portugés) ba da-15 iha Guiné-Bissau hili Embaixadora Maria de Fátima Monteiro Jardim nu’udar Sekretária Ezekutiva CPLP hodi troka Zacarias Albano da Costa ne’ebé hala’o iha loron 18 fulan-Jullu tinan 2025 iha Guiné-Bissau.
Tuir Portál Sekretariu Ezekutivu CPLP nian ne’ebé Tatoli asesu ne’ehaktuir, serimónia asinatura ba Instrumentu Tomada de Pose ba Sekretária Ezekutiva CPLP, Embaixadora Fátima Jardim, ba mandatu tinan rua, akontese durante Konferénsia Xefe Estadu no Governu ba dala XV.
Embaixadora Fátima Jardim hetan proposta husi Repúblika Angola, rekomendasaun husi Konsellu Ministru ba XV Konferénsia Xefe Estadu no Governu nian ba eleisaun ba kargu Sekretáriu Ezekutivu CPLP nian, enkuadra tuir termu kombinadu husi alínea e) husi alínea 2 husi artigu 10 no husi alínea 18 LP husi artigu CP.
Antes ne’e, Zacarias Albano da Costa mak asume kargu nu’udar Sekretariu Ezekutivu hahú tinan 2021, iha ne’ebé mandatu Zacarias nian durante periodu rua.
Biografia badak Maria Jardim
Moris iha Luanda, Maria de Fátima Monteiro Jardim iha lisensiatura iha biolojia hosi Fakuldade Siénsia sira hosi Universidade Lisboa nian.
Nia nu’udar diretora ba Institutu Nasionál Peska no Peskiza Mariña (INIPM) iha Lobito no tuirmai hala’o kna’ar nu’udar diretora ba Institutu Nasionál Peskiza Peska (INIP) iha Luanda. Haree ba nia formasaun no esperiénsia profisionál, nia iha matenek ne’ebé luan iha ekolojia marítima, asuntu oseanográfiku sira no peska.
Nia serbisu nu’udar Ministra Peska nian hosi tinan 1992 to’o 1996 iha Governu Unidade no Rekonsiliasaun Nasionál Angola nian, hafoin nu’udar Ministra Peska no Ambiente husi tinan 1996 to’o 2002. Jardim serbisu nu’udar membru Asembleia Nasionál husi tinan 2003 to’o 2008.
Husi 2008 to’o 2015, nia serbisu nu’udar Ministra Ambiente. Iha 2015, nia haruka ba Konferénsia Nasaun Unida nian kona-ba Mudansa Klimátika (COP 21) 2015, hodi reprezenta Angola no Nasaun sira-ne’ebé Menus Dezenvolvidu iha negosiasaun sira ne’ebé lori ba Akordu Paris nian.
Iha 2019, nia sai hanesan embaixadora Angola nian iha Itália, no mós ba Malta dezde 2021, no ba Albánia dezde 2023.
Jornalista : Hortencio Sanchez
Editór : Cancio Ximenes
