DILI, 15 Setembru 2025 (TATOLI) – Ekipa Na’in-Feto FC garante gaña pontu kontra São José FC iha jogu vola daruak zona apuramentu Liga Futeból Femeninu Timor-Leste (LFFTL).
Treinadór Na’in-Feto FC, Bernardino Soares, esplika, hafoin empata ho VDL FC nia parte sei halo evaluasaun tékniku liuliu hadi’a jogadór sira-nia fíziku nune’e bele gaña pontu tolu bainhira kontra São José iha Kampu Lalenok, 15 Setembru.
“Ami sei esforsu haka’as-an liután liuliu hasa’e estamina nune’e jogu hasoru Saõ José bele gaña vitória,” Bernardino Soares informa ba TATOLI iha Estádiu Munisipál Dili, segunda ne’e.
Bernardino Soares rekoñese São José nu’udar ekipa ne’ebé kompetetivu maibé atuál seidauk iha referénsia natoon tanba seidauk hatene jogadór husi São José.
“Ha’u koko atu esforsu hadi’a di’ak liután,” Bernardino promete.
Nia, argumenta Na’in-Feto FC garante sei hakat liu jogu apuramentu LFFTL nune’e bele hamutuk ho ekipa ualu seluk iha primeira divizaun.
Entertantu, Na’in-Feto FC rasik atuál kolekta pontu 1 hafoin iha jogu abertura loron-sabdu, 13 Setembru empata ho VDL FC 2-2.
Jornalista : Natalino Belo
Editór : Evaristo Soares Martins
