DILI, 16 Setembru 2025 (TATOLI) – Duarte Nunes, deputadu husi bankada CNRT, eleitu ba Primeiru Vise-Prezidente Parlamentu Nasionál (PN) liuhusi eleisaun.
Bankada CNRT aprezenta kandidatu lista únika ne’e, tanba membru meza PN na’in-ida atualmente mamuk hela, tanba Primeira Vise-Prezidente PN, Maria Terezinha Viegas, renúnsia ona nia kargu hodi hala’o misaun diplomátika hodi reprezenta Estadu nian iha rai-li’ur.
Liuhusi prosesu eleisaun ne’e, rezultadu votasaun a favór 38, kontra 0 no abstensaun 16. “Ho nune’e eleitu ona [Primeiru] Vise-Prezidente, Duarte Nunes. Ami konvida mai hola fatin iha meza”, Segundu Vise-Prezidente Parlamentu, Alexandrinho Nunes, fó sai iha sala plenária, ohin.
Aleinde ne’e, deputada CNRT, Maria Terezinha Viegas, hetan substituisaun temporária husi deputada Leocádia de Jesus.
Relembra katak, iha 18 Agostu 2025, Prezidente Repúblika, José Ramos-Horta, fó pose ba Maria Terezinha Viegas hodi asume fali kargu hanesan Embaixadora Timor-Leste ba Japaun, hodi troka embaxadór sesante, Ilídio da Costa, tanba mandatu ramata ona.
Notísia relevante: Xefe Estadu fó pose Maria Terezinha nu’udar Embaixadora Estraordinária ba Japaun
Jornalista: Nelson de Sousa
Editora: Maria Auxiliadora
