DILI, 22 Setembru 2025 (TATOLI)—Koordenadór Gabinte Unidade Kurríkulu Nasionál Ministériu Edukasaun, João Maupelu informa ezame nasionál ne’ebé akontese iha 20 Outubru 2025 ne’e, estudante finalista hamutuk 55.902 mak sei partisipa.
“Agora ita tama halo verifikasaun, ne’ebé ho nia prosesu oinoin hanesan halo verifikasaun ba pontu ezame. Kuandu pontu ne’e loos ona, ita hatama ba sira iha lay out halo finál, depoiz tama ba iha imprime. Tama ona impresaun pontu ezame ne’e la’o besik hotu ona,” Maupelu hateten ba jornalista sira, iha Balide, Dili, Segunda ne’e.
Notísia relevante: ME imprime pontu ezame nasionál iha Setembru no ezame realiza 20 Outubru
João akresenta, bainhira imprime hotu, sei ba halo verifikasaun, sei koloka tuir dixiplina ho eskola idak-idak, depoiz iha 01 Outubru halo ona pakotamentu no iha 17 Outubru ne’e distribui ona pontu ezame nasionál ba eskola sira.
“Ita distribui pontu ezame iha 17 Outubru no iha 20 Outubru realiza ezame nasionál,” Maupelu hateten.
Totál estudante finalista ne’ebé sei partisipa iha ezame nasionál tinan 2025 hamutuk 55.900-resin, kompostu husi ensinu baziku terseiru siklu iha 26.743, ensinu sekundáriu jerál hamutuk 25.012, ensinu tékniku vokasionál iha 13.617 no programa nasionál ekivalénsia ensinu báziku hamutuk 427.
Jornalista: Osória Marques
Editór: Xisto Freitas da Piedade
