STAE Baukau prodús ona kartaun biométriku 30.163
DILI, 24 Setembru 2025 (TATOLI)—Sekretariadu Tékniku Administrasaun Eleitorál (STAE) Munisípiu Baukau, prodús ona kartaun biométriku hamutuk 30.163, ne’ebé akumula husi inísiu lansamentu sistema kartaun biométriku iha fulan-Outubru 2024 to’o fulan ne’e.
“To’o ohin loron STAE Baukau atende ona eleitór 26.17% ne’ebé korresponde ba numéru taxa partisipasaun 30.163,” Diretór Serbisu Munisipál Sekretáriadu Tekniku Administrasaun Elitorál (STAE) Baukau, Natividade Freitas Guterres informa liuhosi telefónika, Kuarta ne’e.
Natividade akresenta hosi númeru ne’e kompostu hosi eleitór ne’ebé troka kartaun hamutuk 27.748 no eleitór foun 2.415, hosi totál eleitór einjerál iha Baukau hamutuk 103.240.
Notísia relevante: STAE Baukau prodús ona Kartaun Biométriku 11.133
Nia hatutan STAE kontinua hala’o prosesu atendimentu ba kartaun eleitorál iha edifísiu munisípiu inklui to’o postu administrativu sira.
“Ita ta’is ona sira-ne’ebé kartaun dupla tanba xefe suku sira la fó lista, entuan kada eleisaun lista sa’e maibé partisipante tun. Tan ne’e, liuhusi biométriku ne’e bele minimiza erru sira-ne’e,” Natividade subliña.
STAE Baukau sei lansa planu faze daruak ba atendimentu kartaun eleitorál biométriku iha postu administrativu ualu tanba maiória eleitór sira-ne’e seidauk hetan kartaun referidu, relasiona ho fatór distánsia, idade no saúde.
Jornalista: Natalino Belo
Editór: Xisto Freitas da Piedade
