VIKEKE, 14 Outubru 2025 (TATOLI)—Xefe Suku Ahik, Postu Administrativu Lakluta, Munisípiu Vikeke, Ercílio Soares informa progresu reabilitasaun estrada kilómetru rua iha Suku Ahik husi obra United Nations Development Programme (UNDP) atinje ona 65%.
“Progresu reabilitasaun estrada iha ha’u-nia suku agora daudaun progrsesu la’o di’ak. Loron-loron badaen sira servisu. Obra referida daudaun ne’e atinje ona 65%,” Ercílio Soares ba TATOLI iha Postu Lakluta, Tersa ne’e.
Autoridade ne’e subliña kada loron autoridade lokál sempre akompaña servisu no estrada ne’e liga bá Aldeia Kaiwa, Ailok, Lalini no Uma-Tolu purvolta kilómetru tolu.
Nia haktuir durante ne’e estrada difikulta komunidade ne’ebé hela iha área rurál no bainhira obra ne’e konkluidu sei ajuda komunidade nia movimentu.
“Ha’u sente obra reabilitasaun estrada ida-ne’e bainhira konkluidu sei fasilita ami-nia movimentu no sei benefísia ami. Estrada referida la’os benifísia ba populasaun Ahik, maibé sei benefísia populasaun iha Postu Lakluta,” Ercílio haktuir.
Obra ne’e hahú implementa iha loron 12 Dezembru 2024, sei konklui iha loron 11 Fevereiru 2025, gasta $489.144.99, responsabiliza husi empreza PRIFY Unipessoal, Lda. Obra ne’e sei benefísia populasaun 12.715 no totál uma-kain 1.496.
Jornalista: Vitorino Lopez da Costa
Editór: Xisto Freitas da Piedade
