DILI, 18 Outubru 2025 (TATOLI)—Diretór Nasionál Ensinu Sekundáriu Jerál (ESJ), Benjamin Fernandes, informa ME atribui ona osan konsensaun eskolár ba estudante Ensinu Sekundáriu Jerál (ESJ) no Ensinu Sekundáriu Tékniku Vokasionál (ESTV) iha territóriu hamutuk 58.782.
“Ami atribui ona konsensaun eskolár ba ita-nia eskola sira iha semana kotuk. Ami hein de’it relatóriu períodu ida-ne’e nian,” nia dehan ba TATOLI iha resintu ME, Segunda ne’e.
Nia dehan, totál osan konsensaun eskolár ne’ebé Ministériu Edukasaun liuhusi Diresaun Nasionál Ensinu Sekundáriu Jerál aloka ona hamutuk $939.842.
“Hosi osan ne’e ita transfere ba eskola públika hosi fulan-Janeiru to’o Jullu hamutuk $507.732, no iha Jullu to’o Novembru hamutuk $432.110. Ida-ne’e ba estudante hamutuk 42.311,” nia akresenta.
Notísia relevante: ME solisita dirijente ESJ atu submete relatóriu konsensaun eskolár
Ba eskola privada nian, nia esplika, transfere ona osan $43.780 ba estudante hamutuk 3.980. Entaun, husi Janeiru to’o Jullu hamutuk $23.880 no hosi Jullu to’o Novembru hamutuk $19.900.
Nune’e mós, Diretór Nasionál Ensinu Sekundáriu Tékniku Vokasionál (ESTV), Fernando Mouzinho, hateten diresaun ESTV transfere ona $885.180 kompostu husi eskola públika hamutuk $861.711,09, eskola privada hamutuk $19.063 no eskola katólika hamutuk $4.334.
“Ita haruka ona ba eskola hotu-hotu iha territóriu. Hein dirijente sira foti hodi utiliza ba atividade eskola nian liuliu ba ezame nasionál. Eskola hamutuk 52 ho totál osan ne’ebé ita transfere ba estudante hamutuk 12.491 iha territóriu,” nia dehan.
Jornalista: Osória Marques
Editór: Xisto Freitas da Piedade
