DILI, 21 Outubru 2025 (TATOLI)—Sekretáriu Estadu Komunikasaun Sosiál, Expedito Loro Dias Ximenes, informa Adezaun Asosiasaun Nasaun Sudeste Aziátiku (ASEAN-sigla ingleza), Sekretaria Estadu Komunikasaun Sosiál (SEKOMS) planeia fortifika formasaun ba jornalista sira.
“Ida-ne’e mak esforsu SEKOMS tau hela no bá-oin SEKOMS nafatin reprezenta Governu iha área komunikasaun sosiál atu oinsá bele fortifika liután formasaun ba jornalista sira oinsá komprende kona-ba ASEAN,” nia dehan ba TATOLI iha salaun Universidade Nasionál Timor Lorosa’e (UNITAL), Bekora, Dili, Tersa ne’e.
Loro Dias dehan planu ida-ne’e sei akontese iha tinan oin tanba oras ne’e daudaun komunidade sempre preokupa kualidade informasaun.
“Tanba ne’e mak iha vizita Primeiru-Ministru Malázia nian mai iha ámbitu Adezaun Timor-Leste nian ba ASEAN, Ministru Komunikasaun ne’ebé hola-parte informasaun ne’e mós ami konkorda malu enkontru ASEAN iha 24-28 ne’e ami sei asina akordu (MoU) ida kona-ba informasaun no dezenvolvimentu ida-ne’ebé sei asina iha Kuala Lumpur,” nia haktuir.
Governante ne’e dehan banhira tama ona ASEAN bele troka informasaun, pur-ezemplu TATOLI iha Timor-Leste troka informasaun ho Ajénsia Notisioza BERNAMA iha Malázia ho mós formasaun, interkámbiu ho jornalista entre Malázia no Timor-Leste.
Jornalista: Osória Marques
Editór: Xisto Freitas da Piedade
