DILI, 22 Outubru 2025 (TATOLI)—Governu liuhusi Primeiru-Ministru, Kay Rala Xanana Gusmão, kuarta ne’e, liuhusi reuniaun Konsellu Ministru aprova projetu Proposta-Lei ne’ebé aprezenta husi Ministru Prezidénsia Konsellu Ministru, Agio Pereira, kona-ba rejime jerál kontraordenasaun.
Bazeia ba dokumentu ofisiál deklara katak diploma ne’e ho objetivu atu fó ba ordenamentu jurídiku nasionál rejime komún ida-ne’ebé uniformiza prinsípiu, norma no prosedimentu sira-ne’ebé aplikavel ba kontraordenasaun ne’ebé prevee iha lejizlasaun espesiál, nune’e hametin protesaun ba direitu sidadaun sira-nian hasoru Administrasaun no promove serteza no seguransa jurídika.
Tamba ne’e, tuir rejime ne’ebé propoin, kualkér hahalok ilísitu, típiku no ho kulpa, ne’ebé bele hetan pena ho koima, konsidera hanesan kontraordenasaun.
Ho natureza administrativa, koima sei aplika husi autoridade kompetente sira, tanba koima ne’e ho intensaun ba karáter disuazivu no edukativu, no hatudu liuhusi pagamentu montante ida-ne’ebé estabelese husi lei.
Enkuantu kontraordenasaun diferensa husi lei penál tanba sira-nia natureza administrativa no funsaun sensura sosiál, ne’ebé permite resposta ida-e’ebé lalais liu no proporsionál liu ba infrasaun ne’ebé la justifika intervensaun penál.
Aleinde ne’e, diploma ne’e define regra jerál ba responsabilidade, klasifikasaun no sansaun sira, inklui koima no iha kazu sira-ne’ebé maka todan liu, sansaun adisionál hanesan lakon patrimóniu sira, bandu atu hala’o atividade sira ka suspensaun ba lisensa no autorizasaun.
Rejime ne’ebé propoin mós prevee prosesu kontraordenasaun ho faze administrativa no faze judisiál ida ba impugnasaun no reapresiasaun, ho objetivu atu garante kontrolu judisiál ba desizaun administrativa no salvaguarda direitu, liberdade no garantia sidadaun sira-nian.
Jornalista : Alexandra da Costa
Editór : Cancio Ximenes
