VIKEKE, 23 Outubru 2025 (TATOLI)–Diretór Servisu Saúde Munisípiu (SSM) Vikeke, Aljaksono S. Maia informa liuhusi Programa Integradu Saúde (PIS) ne’ebé halo konsulta espesiál no halo skrining ba populasaun, konsege deteta kazu tuberkuloze (TB) hamutuk na’in-158 mak iha faze tratamentu.
“Progresu implementasaun servisu TB iha trimestre dahuluk atinje 18%, trimestre daruak atinje 37% no trimestre datoluk 16% ho totál 20%. Maibé, ita hakarak elimina TB iha tinan ida-ne’e komesa tun ba 15%,” Aljaksono S. Maia hateten ba TATOLI iha Postu Vikeke Vila, Kinta ne’e.
Nia haktuir katak husi kazu TB ne’ebé detetadu, daudaun ne’e pasiente sira tuir hela programa konsume ai-moruk TB nian durante fulan neen no pesoál saúde sira kontinua akompaña.
Aljaksono hatutan, programa PIS ne’e pesoál saúde sira lori ekipamentu X-Ray no halo tratamentu kompletu hodi elimina moras TB ne’ebé rejista iha Munisípiu Vikeke.
Nune’e, nia solisita populasaun Vikeke bainhira ekipa pesoál saúde halo skrining tenke hakbesik hodi leno moras sira, karik deteta TB halo tratamentu, nune’e Munisípiu Vikeke bele elimina moras TB.
“Ha’u husu populasaun tenke kolabora ho pesoál saúde sira tanba ita-nia programa PIS daudaun ne’e tama-sai suku lori ekipamentu X-Ray hodi leno populasaun nia saúde,” nia hato’o.
Jornalista: Vitorino Lopes da Costa
Editór: Xisto Freitas da Piedade
