ANATL gasta rihun $30-resin hamoos “rubber” belit iha pista aeroportu nian
DILI, 24 Outubru 2025 (TATOLI)—Prezidente Administrasaun Aeroportu no Navegasaun Aérea Timor-Leste, Empreza Públiku (ANATL, E.P), Romualdo da Silva, hateten daudaun ne’e sira gasta rihun $30-resin hodi hamoos roda fatin aviaun nian (rubber) ne’ebé belit metin iha pista aeroportu Internasionál Prezidente Nicolau Lobato, Komoro.
Prezidente ANATAL, Romualdo da Silva, afirma kona-ba ida atu hamoos roda fatin ne’ebé belit metin iha pista ka “rubber” ne’e daudaun ne’e ANATL prepara ona konkursu públiku ba kompañia loká Reyna Zhunior, ne’ebé manán hodi implementa servisu ida-ne’e.
“Servisu ne’e kompañia sei implementa másimu durante fulan tolu hahú iha inisiu fulan-Novembru. Depende karik sira hamoos hotu ona, entaun kontratu mós ramata. Purtantu ida-ne’e ita tenke asegura tanba iha tempu udan bele fó impaktu ba aviaun bainhira tun (landing) iha aeroportu,” Prezidente ne’e informa ba jornalista sira iha nia kna’ar fatin, Komoro, sesta ne’e.
Nune’e mós nia esplika ho ita-nia kondisaun pista ida ne’ebé mak badak bele hamosu dezastre ba aviaun semo tun ba liu tasi laran ka sai husi arredór aeroportu nian.
“Tanba ne’e ami hanoin hela tanba materiál sira atu uza hodi hamoos ne’e mós tenke distribui husi Indonézia, tanba iha Timor laiha. Materiál sira-ne’e daudaun ne’e iha ona, hein implementa de’it, enkuantu ita gasta osan hodi sosa materiál sira-ne’e la to’o rihun $40,” nia informa.
Entretantu, daudaun ne’e ANATL arrekada reseita ba kofre Estadu hahú husi fulan-Janeiru to’o Outubru hamutuk rihun $2-resin ne’ebé kobre husi tarifa aeroportuáriu (Landing airlines, aerport task, rental car).
“Durante ne’e sira hetan reseita uitoan tanba aviaun operasaun aviaun ladun tun iha aeroportu, pasajeiru mós ladun barak. Fiar katak aban bainrua ho terminál foun no pista halo ona estensaun entaun reseita ami-nia sei sa’e,” nia dehan.
Jornalista : Alexandra da Costa
Editór : Cancio Ximenes
