Rúsia felisita Timor Leste nia adezaun bá ASEAN
DILI, 30 Outubru 2025 (TATOLI) – Embaixadór Rúsia bá Indonézia, Sergei Tolchenov, felisita Timor – Leste nia adezaun plenu bá Asosiasaun Nasaun sira iha Sudeste Aziátiku (ASEAN, sigla inglés).
Embaixadór Rúsia ba Indonézia Sergei Tolchenov hato’o nia deklarasaun iha konferénsia imprensa iha Jakarta, Kuarta ne’e.
Embaixadór Rúsia ba Indonézia Sergei Tolchenov hato’o bemvindu ba Timor Leste nia adezaun nu’udar membru plenu ba ASEAN, ne’ebé nia dehan nu’udar momentu ida atu habelar kooperasaun bilaterál no intra-Rúsia-ASEAN.
“Ne’e hanesan oportunidade di’ak ida hodi inklui Timor-Leste iha kooperasaun Rúsia-ASEAN nian, tanba Rúsia hanesan parseiru estratéjiku hosi ASEAN, no ami kolabora ona iha setór oioin”, hatete hosi Tolchenov, iha enkontru imprensa ida iha Jakarta, iha loron-kuarta ne’ebé TATOLI asesa husi Antaranews.
Nia haktuir, Timor-Leste nia adezaun ne’e prova katak instituisaun ASEAN ne’e luan no abranjente, abranje nasaun hotu-hotu ne’ebé jeografikamente lokaliza iha Sudeste Aziátiku.
Tuir Tolchenov, Rúsia nakloke ona ba envolvimentu Timor-Leste nian iha inisiativa oioin kooperasaun Rúsia-ASEAN nian maske antes nasaun ne’e ofisialmente sai membru plenu.
“Tanba ami kompriende (Timor-Leste nia adezaun ba ASEAN) ne’e inevitavel”, tenik nia.
Embaixadór ne’e mós afirma katak iha tempu badak, reprezentante sira hosi Timor-Leste sei partisipa ofisialmente, hamutuk ho sira-nia omólogu sira hosi nasaun ASEAN sira seluk, iha enkontru joven diplomata sira hosi Rúsia no ASEAN.
Liután, Embaixadór Tolchenov afirma katak Timor-Leste nia adezaun ba ASEAN fó ona impulsu liután ba Moskovu atu loke embaixada ida iha Dili.
“Ita bele diskute iha tempu badak kona-ba kestaun estabelesimentu embaixada rusu ida iha Díli. Klaru, ne’e sei dook hela, maibé ikusmai sei akontese,” nia hatete.
Dadaun ne’e, Embaixada Rusia iha Jakarta mos akreditadu iha Dili.
Nia mós fiar katak Timor-Leste nia adezaun ba ASEAN, no tuirmai loke embaixada ida iha Dili, sei enkoraja reforsa kooperasaun bilaterál, partikularmente iha setór ekonómiku no industriál.
Notísia relevante: Ukránia parabeniza Timor – Leste nia adezaun bá ASEAN no buka hametin kooperasaun bilaterál
TATOLI
