Manufahi kampiaun, Vikeke terseiru lugár iha Kopa Juveníl Sub-17
DILI, 04 Novembru 2025 (TATOLI)—Ekipa futeból mane husi Asosiasaun Futeból Manufahi sai kampiaun no Asosiasaun Futeból Vikeke okupa terseiru lugár iha kompetisaun Kopa Juveníl Sub-17 tinan-2025.
Ekipa Manufahi sai vensedór hafoin iha finál manán Asosiasaun Futeból Dili Leste ho skor 6-1, enkuantu Vikeke okupa terseiru lugár hafoin halakon Asosiasaun Futeból Ermera ho skor 1-0 ne’ebé hala’o iha Estádiu Munisipál Dili, Sesta (31/10/2025).
Jogu iha finál entre ekipa Manufahi kontra Dili Leste ramata ho skor 6-1 iha-ne’ebé golu husi ekipa Manufahi prodús husi jogadór sira hanesan Evander Junior iha minutu 1, Januario Nunes 31, Manuel da Silva iha minutu 62 no 67, Roney 64 no Sergio Gusmão iha minutu ikus 90.
Enkuantu, Asosiasaun Dili Leste enxe golu ida iha minutu 45. Iha fatin hanesan, Asosiasaun Futeból Vikeke hadau sai terseiru lugar hafoin manán Asosiasaun Futeból Ermera ho skor 1-0 iha-ne’ebé golu prodús husi jogadór Nicson Ximenes iha minutu 9.
Ho rezultadu vitória ne’ebé Asosiasaun Futeból Manufahi gaña parte Komisaun oferese Tasa kampiaun, medalla inklui osan ho montante rihun $2 ba sira, enkuantu Asosiasaun Futeból Ermera nu’udár segundu lugár hetan medalla inklui orsamentu ho valór $1.500.
Entretantu, Asosiasaun Futeból Vikeke ne’ebé sai terseiru lugár hetan prémiu medalla inklui orsamentu hamutuk $1.250 no Asosiasaun Futeból Dili Leste nu’udar kuartu lugár hetan prémiu orsamentu hamutuk rihun $1.
Jornalista: Natalino Belo
Editór: Xisto Freitas da Piedade
