DILI, 13 Novembru 2025 (TATOLI)—Ekipa Gabinete Primeiru-Ministru (GPM) lideradu Xanana Gusmão derrota ho ekipa Ministériu Turizmu no Ambiente (MTA) lideradu husi Vise Primeiru-Ministru, Francisco Kalbuadi Lay ho skor 6:9.
Ekipa rua hala’o jogu nu’udár parte kontinuasaun ba kompetisaun Futsál Amizade husi instituisaun Estadu hodi komemora Proklamasaun Independénsia RDTL ba da-50, iha Kampu Futsál Bebora, Kinta ne’e.
Ekipa GPM reforsa husi Primeiru-Ministru, Xanana Gusmão ho númeru kamizola 79 no MTA reforsa husi Vise Primeiru-Ministru atuál Ministru Koordenadór Asuntu Ekonómiku, Francisco Kalbuadi Lay (C/68), hetan entusiazmu husi adeptu ne’ebé hola-parte direta iha tribun.
Jogu iha parte dahuluk ramata bainhira MTA lidera ho skor 3:4 iha-ne’ebé golu husi GPM prodús husi jogadór Kay Olok enxe golu rua (2) no Divio ida (1), enkuantu MTA ne’ebé prodús golu 4 enxe husi jogadór Marcos, Kamazio, Alfredo no João Bosco.
Iha parte daruak, ekipa rua kontinua hala’o jogu ho intensidade aas, mezmu GPM konsege prodús golu tolu liuhosi Xanana Gusmão enxe rua no Kay Olok ida maibe ekipa MTA lidera jogu to’o ramata bainhira prodús tan golu haat liuhosi jogadór hanesan João Bosco, Cancio, Kalbuadi Lay no golu rua husi Marcos.
Kompetisaun Futsál Amizade entre instituisaun Estadu ne’e organiza husi Ministériu Administrasaun Estatál (MAE) ne’ebé abertura iha loron 03 Novembru no sei termina iha 26 Novembru.
Jornalista: Natalino Belo
Editór: Xisto Freitas da Piedade
