GINÉ-BISAU, 20 Novembru 2025 (TATOLI) – Komisaun Nasionál Eleisaun (CNE) Giné-Bisau realiza votasaun antesipada ba militár, polísia, viajante no funsionáriu sira ne’ebé sei hala’o serbisu diretamente ba eleisaun jerál ne’ebé marka ona ba loron 23 Novembru 2025.
Votasaun antesipada ne’e hala’o iha rejiaun Bisau ne’ebé hetan partisipasaun másima husi Forsa Armada no Polísia Judisiária sira.
Prezidente Komisaun Rejionál Eleisaun Bisau, Abubacar Sidico Sambú, esplika katak votasaun antesipada halo atu to’o loron eleisaun forsa sira konsentra de’it ba seguransa, nune’e prosesu hotu la’o ho di’ak.
“Ohin ita realiza uluk votasaun antesipada ba ita-nian forsa seguransa sira, inklui mós ba funsionáriu sira, tanba ida-ne’e previstu iha lei. Entaun, ita kumpre, fó oportunidade uluk ba sira tuir eleisaun ida-ne’e”, Abubacar Sambú dehan ba Tatoli iha Bisau, ohin.
Nia relata katak iha Eleisaun Prezidensiál no Parlamentár tinan ne’e sei hala’o iha rejiaun sia mak hanesan Biombu, Oiu, Cacheu, Bafata, Gabu, Quinara, Tombali, Bolama Bijagos, no Setór Autónomu Bisau.
Husi rejiaun sia ne’e iha sírkulu eleitorál hamutuk 29 no totál Meza Asembleia Votu 3.728, inklui diáspora.
“Votasaun antesipada ohin la’o tuir prosesu, hahú husi tuku 07h00 dadeer to’o tuku 17h00 loraik. Bainhira votante sira vota hotu, ekipa meza sei haree fali kada pesoál vota ne’e nia eleitorál, husi ne’e sei fahe fali ba idaidak nia rejiaun no hafoin eleisaun jerál hotu mak halo kontajen dala ida de’it”, Abubacar Sambú informa.
Nia salienta katak ekipa meza koloka pesoál sira tuir nia rejiaun, tanba eleitór sira bainhira vota tau iha envolve laran naran no rejiaun.
Iha sorin seluk, Xefe Operasionál Misaun Observasaun Eleitorál (MOE) g7+, Felix Piedade, ne’ebé observa votasaun antesipada ne’e dehan iha sírkulu eleitorál neen ne’ebé loke hodi fasilita Polísia no Forsa Armada sira halo votasaun.
Tuir observasaun ekipa MOE, prosesu hotu la’o ho di’ak iha ambinte pás, tanba kuaze militár hotu mak forma hodi ezerse sira-nia direitu votu.
“Buat ida ne’ebe ita nota diferente mak kada sírkulu eleitorál meza só iha ema na’in-haat, ne’ebe kompostu husi Prezidente Meza hodi toma konta ba lista hodi verifika bainhira eleitór sira vota. Ita mós nota katak fatin sira ne’ebé tau kabina votu ne’e tau iha públiku, eleitór sira vota hanesan iha ai-mahon okos, tuir situasaun ne’ebé sira iha”, nia relata.
Hodi akresenta katak iha Misaun Observasaun Eleitorál dahuluk ne’e ekipa la hetan observadór intenasionál balu, iha de’it mak ekipa g7+. “Maibé, prosesu sei kontinua ba oin tanba eleisaun jerál rasik sei realiza iha 23 Novembru”, nia dehan.
Notísia relevante: g7+ aprezenta Misaun Observasaun Eleitorál ba CNE Giné-Bisau
Jornalista: Arminda Fonseca
Editora: Maria Auxiliadora
