Aban, Selesaun U-17 Vs Bangladés iha kualifikasaun AFC Asian Cup
DILI, 21 Novembru 2025 (TATOLI )—Ekipa Selesaun Nasionál Futeból Timor-Leste U-17, tuir oráriu, Sábadu (22/11/2025), sei kontra Bangladés iha jogu kualifikasaun AFC Asian Cup ne’ebé hala’o iha Xina.
Ekipa nasionál futeból Timor-Leste U-17 rasik dezloka ona bá Xina iha Tersa (18/11/2025) ho totál jogadór selesionadu 23 iha-ne’ebé selesionadu liuhusi kompetisaun doméstika Kopa Juvenil Sub-17 ne’ebé maioria reprezenta husi kada munisípiu.
“Jogu referidu Timor-Leste tama iha grupu A, hamutuk ho Xina, Bahrain, Brunei Darussalam, Srilanka no Bangladés,” komunikadu imprensa husi Federasaun Futeból Timor-Leste (FFTL) ne’ebé TATOLI asesu haktuir iha Sesta ne’e.
Ekipa Lafaek sei hala’o jogu dahuluk kontra Bangladés iha lorokraik 15:00 ne’ebé realiza iha Estádiu Tonglianglong.
Aleinde ne’e, tuir oráriu, jogu volta daruak sei kontra Uma-na’in Xina iha Estádiu Yangchuan, Segunda (24/11/2025), kontra Bahrain iha Kuarta (26/11/2025), Brunei Darussalam iha Sesta (28/11/2025) no ikus kontra Srilanka ne’ebé hala’o iha Estádiu Yangchuan, Domingu (30/11/2025).
Tuirmai lista jogadór Selesaun Nasionál Timor-Leste U-17 hanesan:
Guarda rede ; João Baptista, Joel Novo, Levendinho Casmiro.
Defeza : Bendito Misa, Dramicio, Filomeno, Geovanio, Inigo Martins, Florindo Magno, Jacob Maia, Gabriel Carvalho, Reinaldo Viegas.
Médiu : Quevin Ximenes, Paulo Bráz, Jeremias, Jerónimo Nono, Elton, Gilson Costa.
Avansadu : Augusto Ximenes, Manuel da Silva, Frenky Santos, Jyzeus Lay, Germano da Silva.
Jornalista: Natalino Belo
Editór: Xisto Freitas da Piedade
