DILI, 27 Novembru 2025 (TATOLI)—Aleixo Cobra re-eleitu hodi kontinua lidera Asosiasaun Futeból Dili Leste (AFDL) ba períodu 2025-2029 liuhusi votu unanimidade liuhusi III Kongresu AFDL ne’ebé realiza iha Otél Luz Clarita, Bidau, Kinta ne’e.
Prezidente AFDL eleitu, Aleixo Cobra esplika mezmu kongresu tinan-ne’e hala’o tarde maibé importante tenke prenxe regulamentu asosiasaun liuliu estatutu Federasaun Futeból Timor-Leste no regra Federation International Football Association (FIFA) no Asian Football Confederation (AFC) nian.
“Tanba laiha pesoál ruma rejistu atu kompete entaun parte jurídika deside pakote úniku. La’ós ha’u mak hakarak maibé tanba ezijénsia entaun prontu avansa nafatin,” Aleixo Cobra hateten.
Nia kompromete iha mandatu tinan-haat, bá-oin sei realiza programa tolu hanesan kontinua Tasa Sub-15 atualmente sei iha Ataúru, Tasa Sub-23 atualmente sei iha klube Portu Taibessi no programa datoluk mak liga estudante ne’ebé ho objetivu hamosu talentu futebolista iha Timor-Leste liuliu husi Dili.
Iha fatin hanesan, Prezidente FFTL, Nilton Gusmão hato’o parabéns ba estrutura eleitu liuliu Prezidente Aleixo Cobra no membru asosiadu hotu ne’ebé kontinua hetan fiar liuhusi kongresu AFDL.
“Ida-ne’e signifika iha konfiansa totál ba maun Aleixo Cobra bazeia ba istória pasada ne’ebé kontribui maka’as ba dezenvolvimentu futeból iha Timor-Leste,” Nilton Gusmão tenik.
Nilton enkoraja AFDL liuliu estrutura eleitu atu kontinua kria atividade futeból tanba iha kondisaun ne’ebé sufisiente no akumula jogadór mane no feto nune’e futuru bele kontinua kontribui ba selesaun nasionál Timor-Leste.
Durante realizasaun kongresu referidu, rezulta kargu prezidente asumi husi Aleixo da Silva Gama “Cobra”, Luís Casimiro Lopes sai vise-prezidente no membru ezekutivu kompostu husi na’in-tolu hanesan Sansão Gomes, José Januario dos Reis no Jojó Neves de Oliveira ne’ebé hetan votu aklamasaun unanimidade hamutuk 11.
Tema kongresu datoluk períodu 2025-2029 mak “AFDTL ho FFTL unidu ba dezenvolvimentu futeból nasionál no orgullu ba tinan osan-mean Proklamasaun Independénsia RDTL ba da-50”.
Entretantu, totál membru AFDTL hamutuk 13 kompostu husi Maranatha FC, Dili Leste FC, FC Portu Taibessi, Santa Cruz FC, FC Vila Ataúru, FC Faról, Skasa United, Hiber Dili FC, Coração FC, Leste United, Femininu, Arbitrajen no Treinadór.
Jornalista: Natalino Belo
Editór: Xisto Freitas da Piedade
