DILI, 09 Dezembru 2025 (TATOLI)—Sosiedade Sivíl liuhusi Fundasaun Hadomi Timor solisita Governu atu aselera lalais ezbosu-lei krime sibernétika bainhira halo diálogu ho instituisaun Estadu iha Fundasaun Oriente, ohin.
Notísia Relevante: Komisaun A no Governu diskute posibilidade introdús elementu kriminál iha ezbosu lei sibernétika
Diretór Ezekutivu Fundasaun Hadomi Timor, Abrão Monteiro, hateten objetivu prinsipál enkontru ho parte relevante sira hanesan Governu no Parlamentu Nasionál hodi enkoraja ba Governu aselera prosesu elaborasaun ezbosu-lei sibernétika.
“Tanba ne’e ohin ami mós fó paresér matéria kona-ba rekomendasaun husi hanoin koletiva sosiedade sivíl ba Parlamentu Nasionál, atu lori ba halo diskusaun iha plenária, hodi garante espasu dijitál no fó responsabilidade ba kiminozu sira”, Diretór Ezekutivu informa ba jornalista sira iha Fundasaun Oriente, ohin.
Tanba, nia hateten, artigu sira-ne’ebé define iha laran sei ho definisaun jerál, nune’e bainhira iha posibilidade ba futuru bele mós kriminaliza ema-ne’ebé ho intensaun di’ak para koko vulnerabilidade sistema dijitalizasaun ida-nian.
“Inisiativa ida-ne’e tanba durante ne’e sempre mosu problema kona-ba kazu scanning online husi dijitalizasaun, tanba ita adere ona ba ASEAN presiza iha kontrolu másimu hodi garante sistema infraestrutura dijitalizasaun ne’ebé kualidade no seguru ba Estadu,” nia esplika.
Nia hatutan, tanba durante ne’e sosiedade sivil nia observasaun Governu ko’alia de’it maibé asaun mak seidauk implementa ho klaru ba sosiedade no entidade hotu.
Iha biban ne’e, Prezidente Komisaun A ne’ebé trata asuntu Justisa no Konstitusionál iha Parlamentu Nasionál (PN), Patrocínio dos Reis Fernandes, hateten prosesu elaborasaun lei ne’e buat normál ida maibé opiniaun hotu-hotu sei konsidera inklui rekomendasaun husi sosiedade sivíl sira-nia hanoin.
“Ami hatene katak Miniatériu Justisa halo prosesu elaborasaun ne’e sira halo konsultasaun lubuk ida no bele justifika katak ohin loron ami Parlamentu Nasionál seidauk asesu ba ezbosu-lei ida-ne’e, tanba ne’e bainhira Governu submete proposta-lei ami mós sei halo audiénsia públika ho entidade sira-ne’ebé iha relasaun direta ba asuntu ida-ne’e,” nia hateten.
Notísia Relevante: MJ: Lei sibernétika iha hela faze revizaun
Jornalista : Alexandra da Costa
Editór : Cancio Ximenes
