DILI, 11 Dezembru 2025 (TATOLI)–Sekretária Estadu Igualdade (SEI), Elvina Sousa Carvalho hateten presiza hasa’e konxiénsia literásia dijitál online ba seguransa feto no labarik feto sira iha Timor-Leste (TL).
“Signifika bá-oin hasa’e ema hotu nia konxiénsia hodi prevene aan husi tipu violénsia oioin. Tanba ida-ne’e importante tebes atu halo kampaña hodi fahe informasaun no disemina informasaun ba públiku hodi hatene, nune’e ba futuru bele redús violénsia oioin,” Elvina Sousa dehan ba jornalista sira iha Tasi-Tolu, hafoin ensera kampaña Loron 16 Ativizmu Kontra Violénsia Hasoru Feto, Kinta ne’e.
Tuir Governante katak agora feto barak sai vítima ba mídia sosiál tanba kazu online barak liuhusi plataforma online Facebook, Tiktok, WhatsApp hodi hatuun dignidade no halo deskriminasaun no hodi dezvaloriza feto sira.
“Tanba ne’e maka ita presiza servisu hamutuk ho asaun ne’ebé seguru ba feto liuhusi online no offline,” nia dehan.
Nune’e mós, Reprezentante UN Women, Amy Nishtha Satyam, agradese ba Governu Timor-Leste liuhusi Sekretaria Estadu Inkluzaun (SEI) ne’ebe selebra Loron Internasionál Direitu Umanu ne’e importante tebes hodi kombate violénsia hasoru feto no labarik feto iha Timor-Leste.
“Violénsia hasoru feto ne’e hanesan violasaun grave kontra diretu umanu, tan ne’e presiza kombate nune’e ba futuru feto bele sente seguru iha fatin hotu-hotu,” nia subliña.
Iha sorin seluk, Diretora FOKUPERS, Domingas Amaral dehan atividade ohin ne’e importante tebes atu fahe informasaun ba públiku hodi hasa’e koñesimentu oinsá atu redús númeru kazu violénsia ho tipu oioin iha futuru.
Jornalista: Osória Marques
Editór: Xisto Freitas da Piedade
