Top

Lere husu ba líder sira halo reflesaun iha ámbitu natál no tinan foun

Tenente Jenerál, Lere Anan Timur. Imajen/TATOLI

DILI, 23 Dezembru 2025 (TATOLI)–Antigu Xefe Estadu Maiór Jenerál Forsa Armada (XEMGFA) Tenente Jenerál Tito da Costa ‘Lere Anan Timur’ husu ba líder sira atu halo reflesaun iha ámbitu natál no tinan foun.

 “Tinan tuan atu fó fatin ba tinan foun no ba natál ne’ebé agora atu mai 25 Dezembru. Ha’u hakarak husu ba ita hotu, liuliu ba joven no polítiku sira, Na’i Jesus kosokoan sei lori dame no domin mai ita nu’udar nasaun livre no independente mai joven, ita iha dezafiu no problema oinoin maibé ita hakat liu dezafiu sira no rezolve problema,” Lere hateten ba Jornalista sira iha nia Rezidénsia Faról, Tersa ne’e.

Nia dehan, tinan foun tenke diferente no tenke iha nia kontíudu rasik, ne’ebé saida mak seidauk halo iha tinan tuan tenke kompleta iha tinan foun.

“Ita halo sala iha tinan tuan ita tenke halo loos iha tinan foun, ida-ne’e mak importante liu ba ita-nia ukun-na’in sira, ba líder sira nomós ba ita-nia joven povu tomak,” nia katak.

Notísia relevante : Lere: Konsulta Populár hanesan oportunidade únika ba povu deside futuru nasaun  

Nia dehan, nu’udar ulun na’in no líder presiza halo reflesaun iha natál no tinan foun.

“Ita-nia ukun-na’in ne’ebé uluk harii nasaun sira sei moris, sira la haluhan, biar sira iha difikuldade no problema oioin maibé sira la haluhan povu ninia sofrimentu no terus barak,” nia tenik.

Lere reforsa, nu’udar Timoroan no sarani presiza halo reflesaun iha loron boot maski diverjénsia sempre akontese.

Nune’e, nia husu ba lider sira ne’ebé harii nasaun ne’e atu buka no besik malu, diskute ho onestidade no umildade atubele lori nasaun ida ne’e ba oin.

“Ita entrega ona nasaun livre no independente ba ita-nia jerasaun, mas ita hanesan líder sei moris ne’e ita-nia dever seidauk hotu,” nia fó hanoin.

Jornalista     : Natalino Costa

Editora          : Julia Chatarina

Publisidade

Leave a Reply

Latest Post

error: Content is protected !!