DILI, 22 Janeiru 2026 (TATOLI) – Governu lansa, ohin, fatuk dahuluk ba konstrusaun Sentru Inkubasaun Negósiu nian iha Matadouru, Dili.
Lansamentu fatuk ne’e hala’o husi Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, ho akompañamentu husi Ministru Komérsiu no Indústria, Filipus Nino Pereira, Ministru Justisa, Sergio Hornai, Sekretáriu Estadu Kooperativa, Arsénio Pereira, Sekretáriu Estadu Komunikasaun Sosiál, Expedito Dias Ximenes, no deputadu husi Bankada KHUNTO, Olinda Guterres.
Ministru Nino Pereira esplika katak konstrusaun Sentru Inkubasaun Negósiu ne’e hanesan parte husi esforsu Governu nian atu implementa polítika diversifikasaun ekonómika, hodi aposta ba dezenvolvimentu ekonómiku nasionál.
“Ita presiza iha kualifikasaun ba ita-nia rekursu umanu ne’ebé sei envolve direta iha vida emprezariál. Ida-ne’e importante tebes atu ita bele haree oinsá mak promove espíritu empreendedorizmu ba ita-nia foinsa’e sira”, Nino Pereira hateten iha Matadouru.
Sentru Inkubasaun ne’e nia foku mak ba prátika negósiu nian hanesan hahú negósiu, nune’e bele prodús rekursu umanu ka emprezáriu sira ne’ebé iha kompromisu no prontu nafatin hakle’an sira-nia koñesimentu, mantein sira-nia pozisaun hanesan emprezáriu ida iha negósiu.
Projetu konstrusaun Sentru Inkubasaun ne’e ho durasaun tinan ida ne’ebé responsabiliza husi empreza Jiangsu Zhuoxu Construction co, Ltd (Xina) joint venture ho Yongling Holding Unipessoal, Lda (Timor-leste) ho totál orsamentu $3.155.389,40.
Vise-Primeiru-Ministru, Francisco Kalbuadi Lay, hateten konstrusaun Sentru Inkubasaun Negósiu espesiál tebes iha istória Timor-Leste nian. “Sentru ida ne’ebé maka boot liu duké tijolu no muru. Sentru ida-ne’e maka fatin oportunidade, fatin esperansa nian, no fatin ida ne’ebé ideia sira buras, iha ne’ebé hanoin joven sira no emprezáriu sira ne’ebé aten-barani hetan apoiu, orientasaun, no kbiit atu transforma sira-nia mehi sira ba realidade”, dehan.
Tuir nia, vizaun ba Timor-Leste klaru, katak tenke harii ekonomia ida neʼebé diversu no sustentavel, ida neʼebé hamenus dependénsia ba mina no gás, kria empregu di’ak ba foinsa’e sira no ba komunidade iha nasaun ne’e nia sikun hothotu.
“Atu alkansa vizaun ida-ne’e, ita foka hela ba setór xave sira ne’ebé sei dudu ita-nia nasaun ba oin. Ita investe iha agrikultura no peska, ho infraestrutura no irrigasaun ne’ebé di’ak liu, nune’e ita-nia agrikultór no peskadór sira bele hasa’e produsaun no hetan rendimentu ne’ebé di’ak liu”, salienta.
Nia akresenta Sentru Inkubasaun Negósiu ida-ne’e maka sentrál ba vizaun Governu nian no fatin ida-ne’e sei fornese orientasaun no mentorizasaun, hodi ajuda negósiu foun sira hamenus risku sira ne’ebé sira hasoru iha faze inisiál no vulneravel liu.
“Fatin inkubasaun foun ida-ne’e sei liga ita-nia emprezáriu sira ba finansa no investidór sira, hametin abilidade no kapasidade jestaun nian, kria empregu, habelar merkadu, no fó apoiu espesial ba feto, foinsa’e, no emprezáriu rurál sira. Ida-ne’e sei ajuda negósiu sira sai legál, no kompetitivu, nune’e bele kontribui tomak ba ita-nia ekonomia no ita-nia sosiedade”, afirma.
Governante ne’e hateten sentru ida-ne’e la’ós de’it edifisiu ida hanesan fundasaun ba progresu, ba empregu, ba oportunidade, maibé fundasaun ba Timor-Leste ne’ebé forte no reziliente liu.
Iha fatin hanesan, Administradora Postu Administrativu Vera Krús, Teresa Mariano, hateten estabelesimentu Sentru Inkubasaun Negósiu iha futuru bele tulun joven sira iha vida negósiu nian.
“Ha’u husu ba kompania ne’ebé responsabiliza ba projetu ne’e ezekuta tuir duni kontratu ne’ebé iha, nune’e sentru ne’e harii, ajuda ita-nia joven sira iha vida negósiu ninian”, nia hato’o.
Jornalista: Arminda Fonseca
Editora: Maria Auxiliadora
