SEKOMS no Instituto Camões formaliza akordu kooperasaun ba formasaun iha lian portugés
DILI, 04 Janeiru 2026 (TATOLI)—Sekretaria Estadu Komunikasaun Sosiál (SEKOMS) no Instituto Camões, Kuarta ne’e, formaliza akordu kooperasaun iha área komunikasaun ne’ebé foku ba formasaun iha lian portugés ba jornalista timoroan sira liuhusi projetu Konsultóriu Língua ba Jornalista (CLJ, sigla portugés).
Akordu ne’e asina hosi Sekretáriu Estadu Komunikasaun Sosiál, Expedito Loro Dias Ximenes, enkuantu Embaixadór Portugal iha Timor-Leste, Duarte Bué Alves, sai sasin.
CLJ sei fó formasaun no kapasitasaun ba jornalista sira iha lian portugés inklui halo revizaun ba produtu jornalístiku iha órgaun komunikasaun sosiál sira iha Timor-Leste.
Sekiretáriu Estadu hateten, kooperasaun ne’e ba ona faze datoluk, ne’ebé nia parte asina lori Governu Timor-Leste nia naran.
“Sei lori ba Lisboa para depois Señora Prezidente Instituto Camões sei asina no sei implementa,” Expedito Dias Ximenes hato’o iha sala SEKOMS, Palásiu Govermu.
Notísia relevante : ME–Instituto Camões asina MoU ba reabilitasaun saladeaula hitu iha EBC Farol
Akordu ne’e hahú ona iha Janeiru 2026 maibé foin formaliza ohin, ba implementasaun tinan-tolu, hahú 2026 to’o 2029.
Iha biban ne’e, Governante ne’e mós agradese ba Embaixadór Portugal ho nia ekipa no konsidera kooperasaun ida-ne’e importante ba timoroan sira.
“Portugal apoia nafatin kooperasaun ida-ne’e, liliu iha formasaun ba jornalista sira tanba portugés hanesan lian ofisiál ba ita-nia rai,” nia akresenta.
Sekretáriu Estadu konsidera, kooperasaun ida-ne’e simboliza katak Governu Portugal nia prontidaun hodi kontinua apoia jornalista timoroan sira iha formasaun hodi kapasitasaun iha lian Portugés. Tanba ne’e Governu Portugal apoia maka’a ba formasaun ne’e.
Iha fatin hanesan, Embaixadór Portugal iha Timor-Leste, Durante Bué Alves, hateten, Governu Portugal deside atu kontinua ba projetu CLJ tanba konsidera CLJ konsidera dezempeña papel estrátéjiku ba kualifikasaun jornalizmu iha Timor-Leste.
“Formasaun liangua portugés tenke sai hanesan pilar sentrál iha projetu ne’e, nia objetivu mak atu hadi’a kualidade hakerek notísia, halo korresaun ba gramátika, no halo revizaun ba testu,” nia katak.
Jornalista : Natalino Costa
Editora : Julia Chatarina
