BAUKAU, 04 Marsu 2026 (TATOLI)—Ministériu Obra Públika (MOP) tuir planu sei halo identifikasaun ba uma komunidade ne’ebé afetadu antes kompañia responsavel hahú reabilitasaun estrada urbana pakote II iha Baukau Vila.
Koordenadór Tékniku Destakadu Obra Públika Munisípiu Baukau, Diego Cipriano Caleza, esplika Governu selebra kontratu ho kompaña rua hodi responsabiliza projetu reabilitasaun estrada urbana Baukau ne’ebé fahe ba pakote rua iha-ne’ebé pakote daruak seidauk bele hahú projetu tanba sei hein ekipa MOP husi nasionál atu halo identifikasaun ba uma komunidade ne’ebé afetadu tanba tuir dezeñu sei utiliza rai luan metru 17.
Notísia relevante: PM Xanana Gusmão lansa reabilitasaun estrada urbana Baukau
“Kompañia segundu ne’e kona loos iha vila laran, ne’ebé ha’u hanoin molok sira serbisu halo uluk lai identifikasaun public utility sira-ne’e, tanba ida-ne’e alargamentu afeta ba uma komunidade,” Diego Caleza hateten iha ninia kna’ar fatin, Vila Nova, Baukau, Kuarta ne’e.
Nia relata, kompañia responsavel ba pakote daruak to’o agora seidauk iha terrenu tanba sei hein ekipa MOP husi nasionál atu halo identifikasaun ba uma komunidade ne’ebé afetadu no tuir oráriu sei hahú halo prosesu ne’e iha aban, Kinta (05/03/2026), bazeia ba prosedimentu legál hanesan orden traballu ne’ebé fó-sai iha loron 26 Fevereiru.
Aleinde ne’e, pakote dahuluk kompañia responsavel JOVA Construction Unipessoal, Lda hahú mobiliza ekipamentu pezadu no materiál ba lokál projetu husi área Nagardjo to’o rotunda Vila Nova iha-ne’ebé diresaun referida kuaze menus komunidade ne’ebé afeta ba projetu reabilitasaun estrada urbana.
Iha fatin ketak, Eis Prezidenti Konsellu Munisipál Kombatente Libertasaun Nasionál (CMCLN-sigla portugeza), Fernando “Beredu’u” Gusmão preokupa ho prosesu reabilitasaun estrada urbana pakote daruak nune’e ezije ba MOP atu husu kompañia responsavel atu aselera projetu referidu nune’e termina tuir durasaun kontrata.
“Husu ba kompañia sira atu aselera serbisu. Labele sorin la’o, sorin paradu. Ne’e ladún di’ak,” Beredu’u hateten.
Entretantu, Estrada urbana iha Baukau vila hahú lansa iha loron 06 Fevereiru 2026 ho totál kilómetru 23 iha-ne’ebé kompañia JOVA Construction Unipesóal, Lda responsabiliza pakote dahuluk husi diresaun Nagardjo to’o rotunda Vila Nova ho valór orsamentu $4.735.021,55 no pakote daruak husi rotunda Vila Nova to’o Igreja Evajélika Vila Nova responsabiliza husi Kompañia Vage’e Unipesóal, Lda ho valór orsamentu $ 3.768.933,21 ho durasaun serbisu tinan-rua.
Jornalista: Natalino Belo
Editór: Xisto Freitas da Piedade
