DILI, 11 Marsu 2026 (TATOLI)—Ekipa investigasaun halo ona investigasaun ba pesoál Servisu Migrasaun ne’ebé suspeitadu fasilita sidadaun Indonézia ho vistu overstay iha Timor-Leste iha Janeiru, hakat liu Fronteira Batugade bá Indonézia.
“Kazu ne’e foin lalais sai virál iha rede sosiál ho postajen husi Dirsie Graciela Lopes, sidadaun Indonezia feto ida, bainhira hakuur iha Postu Fronteira Batugade, Bobonaro, pesoál Servisu Migrasaun la aplika sansaun administrativa. Pesoál Servisu Migrasaun ne’e tau karimbu alerta ba sidadaun Indonézia ne’e nia Pasaporte tuir rekezitu própriu Migrasaun nian,” Diretora Ezekutiva Servisu Migrasaun, Superintendente Xefe Polísia Natercia Martins, hato’o ba Jornalista sira, iha ninia knaar fatin, Vila-Verde, Kuarta ne’e.
Nia informa, liuhusi investigasaun komprova katak medida sira ne’ebé pesoál Servisu Migrasaun ho naran Olívio Pinto aplika ba sidadaun Indonezia feto ida ne’ebé overstay ne’e kumpre rekizitu aplikável iha regulamentu Servisu Migrasaun.
“Hanesan promete ona rezultadu husi nia prosesu ami sei públika filafali ba públiku atu bele hatene iha tempu ne’ebé ami simu informasaun kona-ba alegasaun kontra ita-nia membru ida-ne’ebé tuir informasaun iha rede sosiál dehan katak, nia fasilita sidadaun Indonézia ida sai husi fronteira no kontra regra,” nia akresenta.
Servisu Migrasaun forma kedan ekipa investigasaun bainhira simu informasaun kona-ba nia membru komete irregularidade.
“Iha prosesu investigasaun ne’e ita foti informasaun, ita rekolla dadus sira hotu, evidénsia husi testamuña nomós evidénsia fíziku hanesan sistema no Pasaporte, nune’e liuhusi koordenasaun Servisu Migrasaun nian ho ita-nia parseiru husi Autoridade Indonézia ninian nomós esforsu husi ita-nia Adidu ne’ebé koloka iha fronteira, ita konsege hetan individuu ne’e nia Pasaporte nomós karimbu ne’ebé tau bainhira nia sai,” Diretora konta tuir.
Notísia relevante : Pesoál Servisu Migrasaun ne’ebé fasilita sidadaun Indonézia ho vistu overstay hakat fronteira hetan ona suspensaun
Durante investigasaun, evidénsia sira ne’ebé foti nomós informasaun husi individuu sira ne’ebé mak haree, prova katak pesoál Servisu Migrasaun Olívio Pinto hola desizaun tuir hela regra.
Tuir lei, depois liu tinan-rua ka tolu mak bele tama Timor-Leste, bainhira tama fali mai mós, nia tenke halo pagamentu mak foin bele tama, tanba Timor-Leste nia sistema no Pasaporte iha ona sinál alerta.
“Entaun evidénsia ne’ebé ita rekolla indika katak iha nia Pasaporte iha alerta sai ninian, katak nia hetan multa, maibé nia la multa bainhira nia tama, nia tenke selu fali multa nomós iha sistema alerta iha ne’ebá katak individuu ida-ne’e la selu multa iha overstay loron ida, signifika nia vistu loron-ida,” nia haktuir.
Aleinde ne’e, pesoál Servisu Migrasaun ne’e la’ós serbisu iha área tau karimbu, maibé nia hanesan tezoreira, simu osan husi ema sira ne’ebé mak hetan prega multa, nia laiha ligasaun ho karimbu.
Sidadaun Indonéziu ho naran Dirsie Graciela Lopes obrigadu selu multa overstay ka viza mate ho montante $150
Nune’e, prova husi rezultadu investigasaun hatudu pesoál imigrasaun Olívio Pinto la komete irregularidade, la viola regra no la kontra lei, maibé nia sai fali vítima ba aktu ne’ebé sidadaun Indonézia feto halo vídeo tau iha nia aplikasaun Tiktok.
“Desizaun ne’ebe ita halo tuir lei, maibe tanba individuu ne’e hetan benefisiáriu husi ita-nia desizaun ne’e mak kontente demais hodi halo publikasaun iha nia Tiktok, entaun husi publikasaun ne’e estraga nia imajen hanesan Autoridade Imigrasaun ida nomós nia família,” nia esplika.
Nune’e, Diretora Ezekutiva ne’e husu ba públiku, banhira simu informasaun ruma presiza haree didi’ak molok publika iha rede sosiál, kona-ba ema ruma nia envolvimentu tenke iha prova ruma atu nune’e bele garante prosesu ne’e ba iha individuu ne’ebe kontra regra hodi nia bele hetan ninia konsekuénsia.
Jornalista : Natalino Costa
Editora : Julia Chatarina
