DILI, 26 Marsu 2026 (TATOLI)–Sekretáriu Estadu Komunikasaun Sosiál, Expedito Dias Ximenes, Kinta ne’e, konvoka reuniaun ho Ofisiál Komunikasaun husi kada ministériu, ne’ebé iha biban ne’e governante ne’e husu atu kontinua divulga no promove atividade IX Governu Konstitusionál.
“Serbisu mídia ofisiál ne’e atu suporta serbisu husi Ministru, Vise-Ministru no Sekretáriu Estadu hodi prepara dadus halo komunikadu impresa, nune’e karik mídia sira husu bele fasilita hodi públika. Labele buat sira ne’ebé ko’alia dadus ne’e tenke ba to’o Ministru, Ministru ne’e ko’alia asuntu polítiku,” Sekretáriu Estadu Expedito hato’o ba Jornalista sira bainhira ramata enkontru iha salaun Diplomata, Ministériu Negósiu Estrajeiru no Kooperasaun (MNEK), iha Praia dos Coqueiros.
Biban ne’e, governante ne’e husu ba pesoál komunikasaun husi ministériu sira atu labele hasai foto hadau malu ho jornalista sira.
“Ohin ita mai atu esplika serbisu hanesan media officer ba ita-boot sira ne’ebé serbisu iha Gabinete Ministru atu ba oin kontinua promove atividade Governu. Ho nune’e, ha’u husu ba media officer atu serbisu hamutuk ho jornalista sira halo komunikadu, prepara dadus sira atu fasilita jornalista no kontinua divulga atividade Governu iha ita-boot sira-nia pájina ofisiál atu ema bele akompaña nafatin serbisu no progresu sira husi IX Governu,” nia akresenta.
Notísia relevante : Sekretáriu Estadu Expedito asina akordu ho mídia lima ba distribuisaun jornál
Expedito esplika, tuir relatóriu daruak husi Matadalan Research Institute públika katak satizfasaun públiku nian ba serbisu IX Governu Konstitusionál 63% no satizfasaun públiku nia ba figura ne’ebé lidera IX Governu, Xanana Gusmão ne’e husi tinan 2023 to’o 2024 iha 72% maibé husi 2024 to’o 2025, iha Xanana Gusmão nia lideransa tuir peskiza ne’e atinje 84%.
Tanba ne’e, Sekretáriu Estadu husu ba Ofisiál Komunikasaun ne’ebé halo funsaun iha kada ministériu atu kontinua promove Governu nia serbisu ba públiku no kria parseria di’ak ho mídia atu mellora serbisu sira iha publikasaun notísia sira.
“Media officer ne’e tenke parseiru di’ak ho mídia tenke kria relasaun di’ak ho jornalista sira atu fornese dadus sira. Kuandu jornalista sira ba kobertura dadus la kompletu imi mak tenke ajuda sira,” nia katak.
Sekretáriu Estadu husu ba Ofisiál Komunikasaun sira atu labele taka informasaun ba jornalista sira.
“Ha’u sei ko’alia iha reuniaun Konsellu Ministru para ministériu idaidak ne’e iha nia Portavós rasik atu nune’e bele ko’alia ho mídia sira,” nia fó hanoin.
Expedito husu ba Ofisiál Komunikasaun sira atu lee barak hodi hatene liután programa prioridade IX Governu Konstitusionál no kada ministériu rasikn inklui orsamentu hodi halo ba iha komunikadu., nune’e kuandu jornalista presiza bele konfirma Ofisiál Komunikasaun sira bele fasilita.
“Media Officer nia serbisu membru Governu domina informasaun ba programa no atividade labele kompete ho jornalista sira halo serbisu jornalizmu,” nia dehan.
Iha fatin hanesan, Diretór Nasionál Diretór Nasionál Desaminasaun Informasaun husi Sekretáriu Estadu Komunikasaun Sosiál, Paulo Quintas, agradese ba Ofisiál Komunikasaun tanba bele partisipa iha enkontru hodi halo avaliasaun, tanba ho avaliasaun ne’e mak atu hadi’a hodi haree saida mak falta no halo hodi justifika serbisu Governu nia.
“Papél Media Officer importante atu informa ba ita-nia públiku kona-ba programa Governu saida maka halo ona no oinsá,” nia hato’o.
Jornalista : Natalino Costa
Editora : Julia Chatarina
