DILI, 31 Marsu 2026 (TATOLI)—Diretór Servisu Apoiu Diagnóstiku no Terapêutika HNGV, Vidal Lopes, informa oras ne’e daudaun Prezidente Autoridade RAOEA nia kondisaun saúde di’ak ona no posilibidade atu alta iha kuarta (01 Abríl 2026).
Notísia Relevante: Ohin, mandatu Autoridade RAEOA termina ona
“Prezidente RAEOA neste momentu kondisaun jerál di’ak. Nia tama iha loron 27 fulan-Marsu iha HNGV tanba ho problema fuan. Espesialista sira husi kardiolojia halo ona tratamentu. Atualizasaun ikus katak nia kondisaun jerál di’ak no posibilidade aban alta,” Vidal Lopes, dehan ba jornalista sira iha HNGV, ohin.
Maibé, nia esplika, karik halo transferénsia ba rai-li’ur, depende ba médiku kardiolojista sira. Se presiza kontinuasaun tratamentu iha rai-li’ur ka lae, ne’e sira mak deside hodi aprezenta abstratu ba juntamediku no juntamediku ne’e mak deside.
“Rezulatdu diagnosa husi Prezidente RAEOA ne’e hatudu katak enfrenta de’it moras fuan no laiha tan moras sira seluk. Tanba ne’e, daudaun ne’e baixa iha Unidade Kuidadu Kooronari Intensivu (ICCU),” nia dehan.
Antes ne’e, Primeiru-Ministru, Kay Rala Xanana Gusmão, hala’o ne’e, vizita hodi haree Prezidente Autoridade Reziaun Administrativa Espesiál Oekusi Ambenu (RAEOA), Régio da Crus, ne’ebé moras no baixa no hala’o hela tratamentu iha Hospitál Nasionál Guidu Valadares (HNGV-sigla portugés) Dili.
“Nia moras hela, antes ha’u atu mai Palásiu Prezidensiál ha’u sei ba vizita tiha nia. Depois, ha’u sei ba haree tan nia,” Xefe Governu hateten.
Notísia Relevante: PM Xanana vizita PA RAEOA baixa iha HNGV
Jornalista : Felicidade Ximenes
Editór : Cancio Ximenes
