DILI, 30 Maiu 2026 (TATOLI)—Brewing Team Leader husi Heiniken, Octaviano Maria Oscar, hateten ema hotu tenke halo reflesaun ba nia an atu kuidadu no konserva Timor-Leste (TL) ba futuru ne’ebé di’ak.
“Timor nia futuru iha ita hotu nia liman. Nu’udár sidadaun Timor kada ema halo reflesaun ba nia an atu bele kuidadu no konserva ita-nia rai ba futuru ne’ebé mak di’ak,” Octaviano dehan bainhira sai oradór ba workshop ho tema ‘Prezerva no konservasaun komunidade ba asaun sustentavel” ne’ebé organiza husi TasiFest, iha Tasi-Tolu, Sábadu ne’e.
Notísia relevante: Ekonomia Azúl no kuidadu tasi garante futuru ne’ebé sustentavel
Nia esplika atividade prinsipál husi workshop ne’e ko’alia liu kona-ba prezerva no konservasaun komunidade ba asaun sustentavel ba futuru mai.
”Mensajen ba ita-nia joven sira katak empreza husi rai-li’ur sira sei mai ho nia polítika rasik atu aposta ba meiu-ambiente ida moos atu aban-bainrua oan no beioan bele moris ho ambiente ne’ebé mak seguru,” nia subliña.
Nia haktuir, kona-ba resiklajen lixu mak iha oin rua, ida mak lixu maran no lixu bokon. Agora lixu bokon mak hanesan mistura ne’ebé iha komposizasaun fo’er ho bee mak disolvidu. Lixu maran mak halo resiklajen husi lixu ne’e halo ba meza no kadeira.
Iha fatin hanesan, estudante Sentru Aprendizajen no Formasaun Eskolár (CAFE-sigla portugeza) husi Aileu, Guegela Soares, agradese tebes ba TasiFest tanba bele kovida sira tuir workshop ne’ebé liga ho prezervasaun no konservasaun nian.
“Husi workshop ne’e oinsá mak atu kuida ambiente oinsá atubele kuidadu lixu sira sai buat ne’ebé mak pozitivu no garante ita-nia nasaun ho sustentabilidade ne’ebé di’ak,” nia tenik.
Estudante sira-ne’ebé mak partisipa iha workshop ne’e husi IOB, UNTL no eskola CAFE Aileu.
Jornalista: Felicidade Ximenes
Editór: Xisto Freitas da Piedade
