AMB ezekuta ona orsamentu trimestrál daruak 49%
BAUKAU, 20 Jullu 2026 (TATOLI)—Autoridade Munisipál Baucau (AMB) ezekuta ona Orsamentu Jerál Estadu (OJE) tinan-2026 hamutuk 49% durante trimestrál daruak.
Sekretáriu Munisipál Asuntu Administrasaun no Finansa, Juvinal Daniel Filipe, esplika prosesu ezekusaun orsamentu pursentu referidu korresponde ba $6.707.326,60 iha-ne’ebé kada kategoria hanesan saláriu vensimentu 55%, transferénsia públika 64%, kapitál dezenvolvimentu 0%, kapitál menór 0%, bens serbisu 34%.
“Ezekusaun orsamentu ba kategória lima iha AMB ba trimestrál daruak atinje 48.7% ka 49%, ” Sekretáriu Munisipál Asuntu Administrasaun no Finansa Baukau hateten iha ninia kna’ar fatin, Vila Nova, Baukau, Segunda ne’e.
Juvinal Belo relata katak husi totál orsamentu ne’ebé iha, ezekusaun ba saláriu vensimentu ba funsionáriu permanente no kazuál korresponde ba $2.850.742,00, bens no serbisu $765.550,00, transferénsia públika $7.707.156,00, kapitál menór ezekusaun $0% husi orsamentu $150.000,00 no kapitál dezenvolvimentu $2.310.213,00.
Aleinde ne’e, saldo atuál husi totál orsamentu hamutuk $6.074.848,60 kompostu saláriu no vensimentu $1.554.163,59, bens no serbisu $239.948,91, transferénsia públika $4.280.736,10, kapitál menór 0% no kapitál dezenvolvimentu 0%.
“Tuir loloos trimestrál daruak atu tama tan ona trimestrál datoluk ne’e liu ona pursentu 50 maibé ita iha problema ezekusaun tanba sistema aprovizionamentu ne’ebé foun,” Juvinal Filipe subliña.
Maski nune’e, prosesu aprovizionamentu iha ona faze finalizasaun iha-ne’ebé rúblika kapitál dezenvolvimentu hahú faze implementasaun tanba kompañia asina ona kontratu ba projetu hamutuk 28 iha tinan-ne’e, bens serbisu kontinua ezekuta, enkuantu kapitál menór ezekuta ona.
Entretantu, Autoridade Baukau ba tinan-2026 hetan alokasaun orsamentu hamutuk $13.802.085,00 ne’ebé fahe ba kategoria lima hanesan saláriu no vensimentu $2.850.742,00, bens no serbisu $765.550,00, transferénsia públika $7.725.580,00, kapitál menór $150.000,00 no kapitál dezenvolvimentu hamutuk $2.310.213,00.
Jornalista: Natalino Belo
Editór: Xisto Freitas da Piedade
