Konstrusaun edifísiu foun EBC Raifun ho orsamentu rihun $350-resin
MALIANA, 13 Agostu 2026 (TATOLI) – Ministériu Edukasaun, liuhusi Diresaun Nasionál Infraestrutura hahú konstrusaun ba edifísiu andar foun Eskola Bázika Sentrál (EBC, sigla portugés) Raifun, postu administrativu Maliana, munisípiu Bobonaru, ho totál orsamentu $350.800 ne’ebé ezkuta husi empreza lokál Lesuburo Unipessoal Lda.
Enjeñeiru tékniku husi Ministériu Edukasaun, Óscar Borges, hatete katak empreiteiru hala’o ona serbisu fíziku semana ida liubá no edifísiu foun ne’e sei iha saladeaula neen, kompostu husi sala tolu iha kraik no tolu iha parte leten.
“Agora sira seribsu kee fundasaun nian, sira hahú ona semana ida tesi-ai iha parte konstrusaun nian. Projetu ne’e nia durasaun tinan ida, no ita garante kompañia konstrui ho kualidade no tuir tempu ne’ebé determina”, Óscar Borges dehan iha lokál projetu, ohin.
Diretór EBC Raifun, Domingos Mendes, apresia esforsu Governu ne’ebé investe iha konstrusaun edifísiu foun ho modelu andar, tanba konsidera infraestrutura ne’e sei fasilita prosesu ensinu no aprendizajen ba estudante sira.
“Ha’u hanoin ho planu Governu nia hakarak eleva kualidade ensinu no aprendizajen iha EBC Raifun, liuhusi konstrusaun edifísiu foun ida-ne’e, tanba númeru estudante iha EBC Raifun boot liu iha munisípiu Bobonaru”, Domingos Mendes adianta.
Nia esplika katak antes ne’e, saladeaula la sufisiente, nune’e estudante sira tenke aprende iha sala ida ho númeru entre 40 to’o 50.
“Ida ne’e halo prosesu aprendizajen ladún di’ak tanba saladeaula la sufisiente. Ho edifísiu foun ne’e, karik remata, ami hanoin sei sufisiente no bele koloka estudante kada sala hamutuk 30”, nia realsa.
Xefe Suku Raifun, Domingos Salvador, agradese ba Governu tanba konstrusaun ne’e halo hodi konsidera númeru estudante iha EBC Raifun ne’ebé aas liu 1.186.
Biban ne’e, nia rekomenda ba Ministériu Edukasaun atu konstrui mós muru protesaun ba eskola, tanba estudante sira seidauk hetan protesaun adekuada.
“Dalaruma sira mai eskola tarde no la tama, no iha tempu intervalu sira sai livre iha li’ur. Bainhira aula remata, sira bolu malu bá uma ona. Se bele, eskola ne’e hotu halo tan muru protesaun, nune’e prosesu aprendizajen bele la’o ho di’ak”, nia hato’o.
EBC Raifun akumula atualmente estudante hamutuk 1.186, no konstrusaun edifísiu andar foun ne’e atu ajuda aumenta kapasidade saladeaula no hadi’a kondisaun ensinu no aprendizajen iha eskola ne’e.
Notísia relevante: EBC Raifun presiza moru protesaun asegura fasilidade eskolár
Jornalista: Sergio da Cruz
Editora: Maria Auxiliadora
