DNMG: Tasi-been maran iha kosteira la’ós impaktu husi rai-nakdoko iha Flores
DILI, 17 Agostu 2026 (TATOLI)-Diresaun Nasionál Meteorolojia no Jeofízika (DNMG, sigla portugés) fó sai katak tasi-been tun ka maran iha kosteira la’ós tanba impaktu husi rai-nakdoko iha Illa Flores, Nusa Tenggara Timur, Indonézia, maibé kauza husi mudansa klimátika ka tempu bailoro.
Diretór Nasionál DNMG, Terêncio Fernandes Moniz, husu ba públiku atu labele pániku relasiona ho informasaun kona-ba atu akontese tsunami iha Timor-Leste, tanba kosteira sira daudaun tasi-been menus.
“Ha’u públiku liuliu peskadór sira labele ta’uk no pániku, maibé nafatin akompaña informasaun kredivel husi DNMG, tanba ita serbisu hamutuk ho Badan Meteorologi, Klimatologi, dan Geofisika (BMKG) ne’ebé sempre pasa informasaun mai relasiona ho situasaun rai-nakdoko, tsunami no seluk tan ne’ebé akontese iha Indonézia no nia impaktu mai Timor-Leste”, Terêncio Fernandes Moniz dehan ba Tatoli, ohin.
Nia esplika katak relasiona ho rai-nakdoko iha Flores, ho magnitude 7,7, ida-ne’e iha indikasaun atu akontese tsunami tanba sira hela ne’e rai kle’an, entaun posibilidade iha, tanba iha área rai-nakdoko ne’e kauza Flores Back-Arc Thrust, estrutura tektónika ativa ida iha parte norte Illa Flores, ne’ebé forma husi prosesu konverjénsia no interasaun entre plaka tektónika iha rejiaun ne’e, maibé nia impaktu mai Timor-Leste ne’e laiha.
Dirijente ne’e salienta katak tsunami ne’e nia karaterístika ne’e bainhira rai-nakdoko hotu dada tasi-been sira ne’e ba hotu tasi kle’an mak lori fali mai mak akontese tsunami ne’e.
“Maibé to’o agora peritu sira iha mundu ne’e seidauk bele halo previzaun, ita mós hela iha zona ne’ebé risku ba rai-nakdoko, entaun atensaun maibé lalika pániku. Tasi-been sira agora menus ka dalaruma maran tiha iha kosteira sira ne’e impaktu husi mudansa klimátika no metereolojia nian, loron maran, kalan nakonu fali”, dehan.
Hodi dehan Governu mós instala ona ekipamentu ka alarme ba rai-nakdoko nian iha tasi-ibun sira, entaun kada loron mós DNMG akompaña laloran tun ka sa’e, liuhusi informasaun ne’e pasa ba peskadór, atu fasilita sira halo atividade iha tasi-laran.
Notísia relevante: IGTL klarifika laiha ameasa tsunami ba Timor-Leste hafoin rai-nakdoko iha Flores
Jornalista: Arminda Fonseca
Editora: Maria Auxiliadora
