IGTL klarifika laiha ameasa tsunami ba Timor-Leste hafoin rai-nakdoko iha Flores
DILI, 17 Agostu 2026 (TATOLI)-Institutu Jeosiénsia Timor-Leste (IGTL, sigla portugés) husu ba públiku atu labele fiar rumór sira no labele pániku relasiona ho rai-nadoko iha Illa Flores, Nusa Tenggara Timur (NTT), Indonézia, tanba laiha indikasaun ameasa tsunami signifikativu ba Timor-Leste.
Prezidente IGTL, Job Brites, hatete, tuir dadus monitorizasaun disponivel, to’o agora laiha indikasaun ameasa tsunami ba Timor-Leste. Maski nune’e, IGTL kontinua monitoriza atividade sízmika iha rejiaun, inklui rai-nakdoko tuirmai (aftershocks) ne’ebé bele kontinua akontese hafoin eventu boot ida.
“Hakarak klarifika katak, to’o ohin loron, seidauk iha métodu sientífiku ne’ebé bele halo previzaun ba rai-nakdoko ho ezatidaun. Sientista sira bele identifika zona ho risku sízmiku aas, monitoriza atividade sízmika no halo estimativa probabilístika, maibé labele determina data espesífika ba rai-nakdoko ida”, nia dehan.
Tanba ne’e, importante atu hatene katak Timor-Leste lokaliza iha rejiaun ne’ebé tektonikamente ativa, nune’e IGTL husu públiku atu nafatin preparadu. “Preparadu la signifika katak rai-nakdoko boot sei akontese agora, maibé ajuda ita atu responde ho kalma no seguru bainhira eventu ida akontese”, nia realsa.
Dirijente ne’e observa katak hafoin rai-nakdoko iha Flores hodi hamate ema, iha mós rumór sei akontese tsunami iha Timor-Leste, nune’e IGTL husu labele fahe rumór, mensajen korrente, áudio, vídeo ka informasaun neʼebé laiha fonte ofisiál, tanba informasaun falsa ka hoax bele hamosu pániku no konfuzaun iha komunidade.
Tanba ne’e, nia sujere ba públiku atu akompaña informasaun ofisiál husi IGTL, Autoridade Protesaun Sivíl, no Diresaun Nasionál Metereolojia no Jeofízika (DNMG, sigla portugés), no ba informasaun seluk liután no dadus tempu-reál, vizita Aplikasaun Monitorizasaun Rai-nakdoko IGTL ne’ebé lansa ona.
Nia lembra katak, iha loron 15 Agostu 2026, Sistema Monitorizasaun Rai-nakdoko IGTL rejista rai-nakdoko boot ida iha rejiaun Illa Flores, Indonézia, ho magnitude 7,3 no profundidade besik 15 km. Badan Meteorologi, Klimatologi, dan Geofisika (BMKG) Indonézia atualiza posteriormente parámetru eventu ne’e ba Magnitude 7,7 ho profundidade 15 km.
Rai-nakdoko ne’e akontese tanba atividade Flores Back -Arc Thrust, estrutura tektónika ativa ida iha parte norte Illa Flores, ne’ebé forma husi prosesu konverjénsia no interasaun entre plaka tektónika iha rejiaun ne’e.
Hafoin monitorizasaun, BMKG Indonézia termina ona alerta tsunami, tanba laiha ona indikasaun ameasa tsunami signifikativu.
Tuir dadus, to’o loron 16 Agostu kalan, vítima mortál rai-nakdoko iha Flores pelu menus na’in-55.
Notísia relevante: Rai-nakdoko iha Flores hamate ona ema na’in-47
Jornalista: Arminda Fonseca
Editora: Maria Auxiliadora
