KRP aprova estimasaun infraestrutura fibra ótika 2027-2031 hamutuk millaun $76
DILI, 18 Agostu 2026 (TATOLI)—Ministru Transporte Komunikasaun, Miguel Gonçalves Manetelu, hateten Komité Revizaun Polítik deside aprova estimasaun infraestrutura ba fíbra ótika 2027-2031 hamutuk millaun $76.
Ministru Transporte Komunikasaun, Miguel Gonçalves Manetelu, relata katak prezensa MTK nian iha KRP ne’e atu hato’o uluk polítika no seidauk ko’alia kona-ba orsamentu, MTK hetan fiar husi Ministériu Finansas hodi lidera PPG rua mak empregu dijitál ba joven potensiál no funsaun husi kabu fibra ótika, hetan aprovasaun ba tinan lima hahú husi 2027-3031.
“Estimasaun orsamentu ba tinan lima hamutuk millaun $88 maibé iha elaborasaun finál husi Ministériu Finansas redús fali ba millaun $76 no estimasaun ba de’it 2027 iha millaun $16. Osan hirak ne’e hotu la’ós kobre de’it husi MTK maibé mós ba Ministériu seluk ne’ebé involve iha PPG 18, maibé sei iha mós elaborasaun anuál hodi haree ninia atividade sira,” Ministru Miguel informa ba jornalista sira iha Ministériu Finansa, Aitarak Laran, ohin.
Governante ne’e dehan Ministériu ne’ebé envolve ba iha PPG 18 ne’e mak husi ME, MS, MAPPF, MAE, no instituisaun sira-ne’ebé tutela iha MTK, Ministeriu sira-ne’e iha ligasaun tanba sira-nia programa propriedade hanesan no ligasaun ho MTK nian
“Entaun, ohin, halo aprezentasaun ko’alia liu kona-ba infraestrutura oinsá mak atu asegura kobertura kabu submariñu ba instituisaun públiku,” nia hateten.
Nia hatutan, hanesan uluk konekta fiu sira harii torre no hahú iha 2011 fiu fibra ne’e dada tiha ona, entaun polítika dahuluk bainhira transforma internet husi CTL, E.P liuhusi DNIK ba to’o munisípiu (postu saúde, edukasaun, sede suku) ne’e presiza infraestrutura hodi halo manutensaun ba BPOM nasionál (torre eletrisidade transmisaun).
“Bainhira BPOM ne’e to’o iha estasaun munisípiu, entaun ita bolu konetividade nasionál hodi asegura katak funsaun fibra ótika ba administrasaun públika bele la’o ho di’ak,” nia hateten.
Ne’ebé, nia dehan, ohin avansa ho ida-ne’e, hetan apresiasaun husi KRP no sira fo tempu ba Ministériu katak iha loron sesta (21/08) tenke submete fali ba KRP. Karik sira submete mak haree loos ona entaun tuir mai avansa fali ho programa Ministériu nian.
“Daudaun ne’e fibra ótika ne’ebé instala iha instituisaun Estadu hamutuk 993 ne’ebé mak konektadu ona,” nia dehan.
Jornalista : Alexandra da Costa
Editór : Cancio Ximenes
