Tinan 51 FALINTIL: Deputadu husu Governu buka tuir Nicolau Lobato nia ruin
DILI, 19 Agostu 2026 (TATOLI) – Tinan barak ona nia mate iha luta ba libertasaun nasionál, maibé restu mortál Prezidente Nicolau Lobato seidauk hetan. Tanba ne’e, deputadu husi Partidu Kongresu Nasionál Rekonstrusaun Timorense (CNRT, sigla portugés), Natalino dos Santos, iha véspera aniversáriu FALINTIL ba da-51 (20 Agostu 1975-20 Agostu 2026), solisita ba Governu atu intensifika esforsu hodi buka tuir no lori fila restu mortál eroi nasionál ne’e.
Deputadu ne’e konsidera katak buka tuir restu mortál Nicolau Lobato no eroi sira seluk tenke sai prioridade Estadu, tanba sira sakrifika vida ba nasaun.
Nia husu ba Governu atu kotinua no aumenta esforsu diplomátiku ho Governu Indonézia hodi buka tuir fatin ne’ebé eroi sira-nia restu mortál hela no se hetan lori fila mai Timor-Leste atu haloot ho dignu tuir kultura Timór nian.
“Tanba, ita iha polítika rekonsiliasaun, respeita sira hanesan [país] viziñu no amigu, husu sira atu tempu ona entrega ita-nia eroi sira-nia ruin hodi ita bele haloot ho dignu tuir kultura Timór nian “, nia hatete iha Parlamentu Nasionál, ohin.
Deputadu ne’e mós salienta katak kestaun kona-ba restu mortál eroi sira ne’e la’ós de’it responsabilidade família, maibé sai ona asuntu Estadu, tanba sira sakrifika moris hodi defende independénsia no soberania Timor-Leste.
Nicolau Lobato, eroi nasionál, Prezidente Dahuluk RDTL no Komandante Ein-Xefe FALINTIL, moris iha 24 Maiu 1946 iha Sasatan Oan, Aitara Hun, Soibada, postu administrativu Laklubar, munisípiu Manatutu. Nu’udar oan dahuluk husi aman Narcísio Manuel Lobato husi Leorema, postu administrativu Bazartete, munisípiu Likisá, no Felismina Alves Lobato, Soibada-oan ne’ebé moris iha Malurukumu/Makadike, postu administrativu Uatulari, munisípiu Vikeke.
Nicolau Lobato mate iha 31 Dezembru 1978 durante luta armada. Nia luta ba libertasaun Timor-Leste hodi hetan independénsia ho filozofia moris “A Última Bala é a Minha Vitória”.
Iha sorin seluk, deputadu husi Partidu Demokrátiku (PD), Manuel Henrique Noronha, hatete katak Governu iha responsabilidade atu buka tuir restu mortál eroi sira ne’ebé lidera luta ba libertasaun no, to’o ohin loron, seidauk hetan, hodi bele haloot iha fatin ne’ebé dignu.
Nia hatete FALINTIL nia aniversáriu nu’udar loron istóriku ba nasaun, tanba durante tinan 24 sira halo luta iha ai-laran, sakrifika-an no sofrimentu boot to’o país hetan independénsia.
Manuel Noronha konvida sidadaun hotu atu iha komemorasaun ne’e fó omenajen no onra ba eroi no mártir sira ne’ebé sakrifika sira-nia moris ba libertasaun país.
Nia husu ba Governu atu tau-matan ba membru FALINTIL sira balun ne’ebé iha tempu ukun-an ne’e seidauk hetan atensaun.
Notísia relevante: 20 Agostu: Reprezentante povu apela ba líder nasionál sira hamutuk lori nasaun ba oin
Jornalista: Nelson de Sousa
Editora: Maria Auxiliadora
