FRETILIN konvoka reuniaun CCF iha semana oin hodi analiza situasaun partidu
DILI, 21 Agostu 2026 (TATOLI)-Partidu Frente Revolusionária Timor-Leste Independente (FRETILIN) marka ona data iha 29 Agostu atu konvoka reuniaun membru Komité Sentrál FRETILIN (CCF, sigla portugés) hodi analiza situasaun partidu nian.
Adjuntu Sekretáriu-Jerál FRETILIN, Flávio Maria da Silva, hatete konvokatóriu sai ona, reuniaun ne’e ho nia ajenda atu haree situasaun polítika atuál, asuntu país nian no partidu nian.
Aleinde ne’e, diskute mós reorganizasaun estrutura partidu nian, tanba Prezidente Partidu Francisco Guterres “Lú Olo” fila hikas ona ba Na’i Maromak Nia kadunan Santu no daudaun kargu ne’e asume interinamente husi Sekretáriu-Jerál, Marí Alkatiri.
Nia dehan iha posibilidade diskute mós partidu nia kandidatura hodi kompete ba iha eleisaun prezidensiál iha tinan 2027. “Hafoin sei hasai [desizaun] hodi aprova rezolusaun balun”, nia informa ba Tatoli via telefone, ohin.
Partidu sei hala’o kongresu normál iha fulan-Setembru 2027, tanba kongresu ikus realiza ona iha Setembru 2022. Tuir estatutu partidu no Lei Partidu Polítiku, kada tinan lima realiza kongresu nasionál no konferénsia hodi halo reorganizasaun ba estrutura.
Daudaun, partidu finaliza ona atividade reorganizasaun estrutura husi baze, aldeia, suku no postu administrativu no agora tama ba konferénsia munisipál ne’ebé sei hala’o iha fulan oin.
“Ida-ne’e halo hodi prepara ba kongresu nasionál ne’ebé atu mai. Ho ida-ne’e, partidu preparadu atu kompete iha eleisaun prezidensiál”, afirma.
Notísia relevante: Marí Alkatiri asume interinamente kargu Prezidente Partidu FRETILIN
Jornalista: Nelson de Sousa
Editora: Maria Auxiliadora
