Governu harii CN-CAT hodi kombate rede transnasionál fraude finanseira dijitál
DILI, 26 Agostu 2026 (TATOLI)—Governu liuhusi reuniaun Konsellu Ministru, kuarta ne’e, aprova projetu dekretu Governu hodi hari’i Sentru Nasionál ba Koordenasaun, Avaliasaun no Kombate Ameasa Transnasionál (CN-CAT), ne’ebé prevee ona iha planu nasionál integradu ba prevensaun no kombate rede transnasionál fraude finanseira dijitál.
Vise-Ministru Asuntu Parlamentár, Adérito Hugo da Costa, hateten ohin iha Konsellu Ministru iha mós dekretu Governu ida ba kriasaun sentru nasionál koordenasaun no avaliasaun ba kombate ameasa transnasioná, ne’ebé hetan apoiu husi plataforma burla online (SCAM), kriminalidade sibernétika organizada no tráfiku umanu, ba períodu 2026 to’o 2031.
“Ne’e hanesan medida ida-ne’ebé Governu kontinua halo iha setór seguransa nian hodi halo koordenasaun efetivu liután ba atividade kontra bandu sira-ne’ebé akontese liga ho krime transnasionál ne’ebé ikus-ikus ne’e sai koñesidu,” Governante ne’e informa ba jornalista iha sira Palásiu Governu, ohin.
Governu buka nafatin hakbi’it instituisaun Estadu nian hodi bele regula no proteje rede krime ne’ebé avansadu, entaun Governu mós tenke iha preparasaun estratéjia medida preventiva nian ne’ebé di’ak liután.
CN-CAT funsiona ho tutela direta husi Primeiru-Ministru no ninia misaun mak atu garante koordenasaun inter-institusionál, avaliasaun integradu ba ameasa sira nomós apoiu ba foti desizaun estratéjiku Governu nian iha prevensaun no kombate ba ameasa transnasionál sira ne’ebé bele afeta seguransa nasionál, soberania dijitál, estabilidade ekonómika, integridade sistema finanseiru nasionál ka intereses estratéjikus Estadu nian.
Ameasa sira-ne’e inklui fraude finanseira dijitál, plataforma burla online, kriminalidade sibernétika organizada, entrada no estadia ilegál hosi sidadaun estranjeiru sira iha territóriu nasionál nomós tráfiku umanu.
Sentru ne’e halibur reprezentante husi entidade prinsipál sira-ne’ebé iha responsabilidade iha área hirak ne’e no koordena husi Diretór-Jerál Servisu Nasionál Intelijénsia Estratéjika nian, ne’ebé hetan apoiu husi Diretór Polísia Sientífika Investigasaun Kriminál.
Entre ninia funsaun prinsipál sira mak avaliasaun permanente ba ameasa sira, elaborasaun relatóriu no alerta estratéjiku ba Primeiru-Ministru, fahe informasaun entre entidade partisipante sira, koordenasaun téknika no planeamentu ba asaun konjunta sira, nune’e mós akompaña implementasaun medidas ne’ebé prevee ona iha Planu Nasionál.
Enkuantu CN-CAT nia atividade la altera kompeténsias hosi entidade sira ne’ebé halo parte iha nia. Atuasaun CN-CAT mós la fó ba nia podér investigasaun kriminál ka diresaun operasionál nian. Ministériu Públiku mantein nafatin kompeténsia atu dirije investigasaun kriminál.
Jornalista : Alexandra da Costa
Editór : Cancio Ximenes
