PNDS iha Suku Fatulia finaliza ona reabilitasaun estrada iha Agostu
BAUKAU, 09 Setembru 2026 (TATOLI)—Atividade regulár Programa Nasionál Dezenvolvimentu Suku (PNDS) iha Suku Fatulia, Postu Administrativu Venilale, finaliza ona reabilitasaun estrada diresaun Aldeia Uaitobono ba sede suku iha tinan-ne’e.
Xefe Suku Fatulia, Angelino Moises Pereira, esplika prosesu implementasaun atividade referida finaliza ona iha fulan-Agostu maibé parte autoridade sei hato’o pedidu ba Autoridade Munisipál Baukau atu kontinua tan tanba orsamentu ne’ebé utiliza sei restu iha konta banku.
Notísia relevante: Autoridade Suku Fatulia sei kontinua reabilita estrada iha Aldeia Uaitobono
“Ita finaliza ona pursentu 100 tuir kalkulasaun téknika PNDS nian hanesan cor betaun ba estrada no konstrui valeta,” Xefe suku Fatulia informa ba TATOLI iha Vila Nova, Baukau, Kuarta ne’e.
Angelino Perreia relata prosesu hotu finaliza ona bazeia ba item hanesan cor betaun hamutuk distánsia metru 450 no konstrusaun valeta metru 150 iha-ne’ebé ezekuta de’it orsamentu hamutuk $26.600 husi totál orsamentu ba tinan-ne’e hamutuk rihun $32.
Estrada referida mezmu ramata ona maibé sei presiza kompleta tan tanba orsamentu restu hamutuk $7.400 nune’e tenpu badak sei kontinua ho cor betaun ba estrada metru 140 no konstrui valeta metru 55.
“Bainhira ita-nia pedidu revizaun hetan aprovasaun posivelmente fulan-ne’e bele kontinua fali,” Angelino Perreia akresenta.
Autoridade Suku Fatulia liuhusi Reuniaun Konsellu Suku deside kontinua reabilitasaun estrada rurál diresaun Uaitobono ba sede suku iha tinan-2025 hodi reabilita ba área risku hanesan cor betaun no konstrui valeta ho distánsia kilómetru ida-resin ne’ebé aloka orsamentu hamutuk $37-resin maihusi fundu infraestrutura rihun $32 no fundu operasionál hamutuk rihun $5-resin.
Entretantu, Suku Fatulia hamutuk aldeia haat kompostu husi Bahadato, Osso-uaque, Uatulia-ana no Uaitobono ho tótal populasaun 2.721 husi uma-kain 688.
Jornalista: Natalino Belo
Editór: Xisto Freitas da Piedade
