Monseñor Santa Sé konsidera Preladu Na’in-haat nu’udár figura iha istória Katólika nian

DILI, 10 Setembru 2026 (TATOLI)—Reprezentante Santa Sé iha Timor-Leste, Monseñor Marcel Smejkal, konsidera Preladu Na’in-haat ne’ebé simu respeitu ikus la’ós de’it naran ne’ebé grava iha istória, maibé nu’udár figura ne’ebé husik hela legadu servisu, korajen, dame no defeza povu nia dignidade.

Notísia relevante: Preladu Katóliku Na’in-haat haloot ona iha Igreja Katedrál Dili 

“Figura sira-ne’ebé ohin loron ita hanoin la’ós de’it naran sira iha istória Igreja Katólika nian, maibé Preladu Na’in-haat ne’e hatudu ona signifikadu ‘bibi-atan di’ak’. Katak, líder Igreja nian ne’ebé iha vontade atu la’o hamutuk ho kongregasaun no la abandona sira,” Monseñor Marcel hato’o mensajen ida-ne’e iha misa solene ba Preladu sira kompostu husi Don Jaime Garcia Goulart, Don José Joaquim Ribeiro, Monseñor Martinho da Costa Lopes no Don Alberto Ricardo da Silva iha Tasi-Tolu, Dili, Kinta ne’e.

Monseñor Marcel subliña bibi atan loloos la’os de’it mosu iha situasaun fásil, maibé iha vontade atu hakbesik ba sira-ne’ebe terus, lakon no presiza protesaun. Ida-ne’e, reflete iha Preladu Na’in- haat nia moris no servisu ne’ebé Igreja no povu Timor-Leste hanoin hikas.

Nia dehan Preladu sira presta servisu iha períodu istóriku ne’ebé la hanesan, maibé sira iha komún korajen atu iha povu nia leet no fó kontribuisaun tuir nesesidade povu nian iha tempu ne’ebá.

Tuir nia, Preladu sira-ma ministériu habelar liu asuntu relijiozu sira no foka ba edukasaun, formasaun umana, protesaun ba sosiedade, no defeza ba dignidade umana.

Monseñor esplika tan, kona-ba Don Jaime Garcia Goulart nia kontribuisaun ba edukasaun no formasaun jerasaun foun sira, maka parte krusiál ida hodi prepara sosiedade ba futuru.

Monseñor Martinho da Costa Lopes hanoin hikas nu’udár figura Igreja nian ida-ne’ebé brani ko’alia kona-ba povu nia terus bainhira povu Timor-Leste moris iha situasaun difísil nia laran.

Korajen atu hamriik hamutuk ho sira-ne’ebé terus, tuir Monseñor ne’e, sira (Preladu) enfrenta terus no hatudu oinsá Kreda hala’o ninia misaun servisu nian la’ós de’it liuhusi liafuan, maibé mós liuhusi hahalok sira.

Nia mós hanoin hikas Don Alberto Ricardo da Silva nu’udár figura ne’ebé lori mensajen dame, perdaun no rekonsiliasaun.

Nia informa, kompromisu ba perdaun no rekonsiliasaun iha signifikadu importante ba sosiedade ida-ne’ebé esperiénsia ona konflitu tanba dezenvolvimentu nasaun ida-nian prezisa mós kura husi kanek pasadu nian.

Aleinde ne’e mós nia liga preladu na’in haat nia hahalok ezemplár ba mensajen ne’ebé hato’o hosi Papa Francisco durante nia vizita apostólika iha Timor-Leste iha Setembru tinan 2024.

Nia dehan preokupasaun ba labarik sira, joven sira, ki’ak sira no sira-ne’ebé hasoru opresaun tenke sai nafatin parte esensiál ida husi misaun Igreja nian. Tanba ne’e, fó onra ba Preladu Na’in-haat la’ós de’it atu komemora pasadu, maibé mós sai hanesan oportunidade ida atu hatutan valór sira- ne’ebé sira husik hela ba jerasaun agora no futuru.

“Bibi-atan na’in-haat ne’e fó sira-nia vida hodi proteje povu no la halai hosi perigu. Ohin, bainhira ita akompaña sira-nia ruin ba sira nia fatin deskansa, sira-nia sasin lori bá-oin,” nia dehan.

Iha biban ne’e mós nia husu ba líder sivíl sira no autoridade sira atu banati tuir sira-nia dedikasaun ba interese komún. Nia mós husu ba kongregasaun no jerasaun foun sira atu halo fiar, dame, servisu no preokupasaun ba ema seluk sai parte ida hosi legadu ne’ebé tenke mantein.

Maski nune’e, Preladu sira-nia moris ramata ona, sasin no valór sira-ne’ebé sira husik hela bele kontinua sai fonte esperansa ba jerasaun sira Timor-Leste nian.

Jornalista: Osória Marques

Editór: Xisto Freitas da Piedade