Alkatiri: Kuadru sira livre kandidata an ba Eleisaun Prezidensiál
DILI, 11 Setembru 2026 (TATOLI) – Prezidente Interinu no Sekretáriu-Jerál Partidu Frente Revolusionária Timor-Leste Independente (FRETILIN), Marí Alkatiri, hatete katak kuadru FRETILIN sira iha liberdade atu aprezenta sira-nia kandidatura nu’udar kandidatu indepedente ba Eleisaun Prezidensiál iha 2027.
Antes ne’e, Komité Sentrál FRETILIN foti desizaun no rezolusaun atu partidu la aprezenta kandidatu ba Eleisaun Prezidensiál 2027, ho razaun balun.
Maibé, desizaun ne’e hamosu diskusaun iha públiku kona-ba FRETILIN, nu’udar partidu boot ida, laiha kandidatu ba sufrájiu tuirmai. Enkuandu ne’e, iha kuadru balun, inklui Jenerál Reformadu Lere Anan Timur, ne’ebé antes ne’e hatudu ona intensaun atu kandidata an hanesan indepedente.
Kestiona kona-ba pozisaun partidu FRETILIN, Alkatiri hatete katak desizaun ne’ebé partidu foti ne’e parte husi polítika no estratéjia FRETILIN nian, nune’e kuadru sira iha liberdade atu kandidata an.
“Ne’e sira bele preokupa. Ne’e polítika no estratéjia FRETILIN nian. Se sira komprende bainhira akompaña prosesu ne’e”, nia hatete liuhusi konferénsia imprensa ne’ebé hala’o iha estúdiu MA Podnaroman, Faról, Dili, sesta-feira ne’e.
Tanba ne’e, nia salienta katak kuadru sira livre atu aprezenta sira-nia kandidatu, nu’udar independente.
“Sira iha liberdade. Ha’u uluk ko’alia sira hirus, nune’e imi hanesan FRETILIN sei la manán. Entaun, di’ak liu fó de’it imi-nia kartaun ha’u rai hela lai, para ema bele fiar imi. Agora la’ós FRETILIN ona. Agora la’e, la kandidata an hanesan FRETILIN, más indepedente. Más hakarak mantein kartaun, entaun ema hothou no ha’u dehan sira FRETILIN, tanba kartaun sira la entrega”, Alkatiri argumenta.
Mari Alkatiri destaka katak Partidu Kongresu Nasionál Rekonstrusaun Timor-Leste (CNRT) mós nunka tau ninia kuadru rasik kompete iha eleisaun prezidensiál sira liubá. Maibé, tuir nia, públiku lahamosu preokupasaun hanesan agora bainhira FRETILIN desize la aprezenta kandidatu.
Lembra katak Adjuntu Sekretariu-Jerál FRETILIN, Flávio Maria da Silva, antes ne’e mós hatete partidu la aprezenta kandidatura rasik ba Eleisaun Prezidensiál iha 2027, tanba halo ona tetu no konsiderasaun kle’an ba kestaun balun.
Kona-ba desizaun partidu la aprezenta kandidatu rasik ne’e bazeia ba desizaun no rezolusaun Reuniaun Komité Sentrál FRETILIN (CCF, sigla portugés) iha loron 29 Agostu 2026.
Notísia relevante: https://tatoli.tl/2026/08/31/fretilin-la-aprezenta-kandidatura-ba-eleisaun-prezidensial-foka-ba-hametin-estrutura-partidu/
Jornalista: Nelson de Sousa
Editora: Maria Auxiliadora
