SEKOMS apoia subvensaun $24.750 ba asosiasaun jornalista sira
DILI, 11 Setembru 2026 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes, asina kontratu subvensaun públika $24.750 ho reprezentante asosiasaun jornalista haat hodi halo atividade Mídia Tour hodi komemora Loron Nasionál Liberdade Imprensa, ne’ebé sei akontese iha fulan-Outubru 2026.
Asosiasaun jornalista sira ne’e mak Timor-Leste Press Union (TLPU), Asosiasaun Jornalista Timor Lorosa’e (AJTL), Uniaun Profisionál Jornalista Timor-Leste (UPJTL) no Asosiasaun Rádiu Komunidade Timor-Leste (ARKTL).
Diretór Nasionál Dezenvolvimentu Mídia iha SEKOMS, Júlio Lopes, hatete objetivu apoiu fundu ba asosiasaun ne’e atu jornalista sira halo Mídia Tour hodi hakbesik an ba komunidade atu pasa informasaun no foti informasaun ne’ebé relevante ho sira-nia serbisu, inklui mós literasia midiátiku ne’ebé sira rasik sei halo iha baze, liuliu iha munisípiu sira ne’ebé hili.
“Totál subvensaun ne’ebé ita apoiu ba asosiasaun haat ne’e hamutuk rihun $24 ne’ebé kada asosiasaun hetan rihun $5-resin”, Júlio Lopes hatete iha Gabinete SEKOMS, ohin.
Nia esplika katak, tuir proposta husi asosiasaun jornalista sira, atividade sira ne’ebé sei hala’o durante loron lima, liuliu rekolla informasaun sira iha fronteira sira hanesan Oekusi, Maliana no Suai, no mós halo formasaun iha área jornalizmu nian iha eskola sira.
Sekretáriu Estadu Komunikasaun Sosiál, Expedito Dias Ximenes, husu ba asosiasaun jornalista sira atu uza fundu ne’e ho didi’ak, liuliu iha atividade Mídia Tour.
“Mídia Tour ne’e nia objetivu prinsipál mak lori informasaun ne’ebé loos, kombate informasaun falsa no halo literasia midiátik. Ida-ne’e importante tanba ho prezensa Artifisál Intelijénsia [AI] ne’ebé agora maka’as iha mundu, ita tenke halo separasaun ne’ebé klaru tanba AI ne’e nia lori mós oportunidade, benefísiu. maibé mós lori risku”, nia dehan.
Tuir governante, prezensa AI ne’e ajuda tebes serbisu jornalista nian, maibé jornalista sira tenke tais informasaun sira, nune’e to’o ba públiku nia matan ema bele fiar.
“Ha’u husu mós asosiasaun haat ne’e presiza halo formasaun interna, uza osan uitoan ne’ebé iha. Formasaun loron ida de’it mós di’ak, bolu espesialista ne’ebé hatene uitoan kona-ba jornalizmu investigative, nune’e jornalista sira simu informasaun labele hatún tomak, maibé tenke investiga didi’ak faktu loos ona mak hatún. Nune’e públiku bele fiar ita-nia informasaun sira, kualidade informasaun importante”, nia realsa.
Prezidente Asosiasaun Rádiu Komunidade Timor-Leste (ARKTL), Prezado Ximenes, dehan osan ne’ebé sira simu ne’e atu hala’o atividade kona-ba komemorasaun Loron Liberdade Imprensa ne’ebé sei hala’o iha fOutubru.
Entaun, husi orsamentu ne’e aloka ba atividade rua ba asosiasaun jornalista sira hodi hala’o atividade Mídia Tour, maibé ba ARKTL sei hala’o diskusaun mídia nomós halo long march.
Atividade ne’e sei envolve entidade sira seguransa hanesan Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), asosiasaun jornalista sira hodi halo diskusaun ida kona-ba polítika ka rekomendasaun ruma ba SEKOMS oinsá atu garante serbisu jornalizmu iha terrenu.
“Entaun liuhusi diskusaun ne’e espésie deklarasaun komún ida entre jornalista no entidade sira ne’ebé durante ne’e serbisu ho jornalista sira, nune’e sai hanesan matadalan ida ba ita hotu nune’e serbisu jornalista iha futuru ne’e seguru”, nia dehan.
Tuir nia, iha atividade long march sei fó espasu ba jornalista sira no mós estudante sira bele ko’alia sira-nia hanoin iha diskusaun palku, liuliu kona-ba liberdade imprensa ne’ebé durante ne’e hala’o iha Timor-Leste.
“Ida-ne’e mak sai atividade prinsipál ba ARKTL. Subvensaun ne’ebé ami simu ne’e hamutuk rihun $5-resin”, nia konklui.
Notísia relevante: SEKOMS koopera ho CI sei fasilita formasaun jornalizmu investigativu ba jornalista sira
Jornalista: Arminda Fonseca
Editora: Maria Auxiliadora
