Fundasaun Nippon lansa filme dokumentáriu jogadór defisiénsia tilun nia jornada iha Japaun
DILI, 27 Setembru 2026 (TATOLI)–Sentru Voluntáriu Fundasaun Nippon lansa filme dokumentáriu ‘Tokyo 2025 Deaflympics: Atleta Badminton Timor-Leste – Tokyo Stay Documentary’ ka kona-ba atleta defisiénsia tilun na’in-tolu nia jornada iha Japaun.
Filme ne’e foka liu viajen husi atleta badminton na’in-tolu hanesan Ivónia Fátima Guterres, Abrão Gusmão, no Domingos Freitas Belo, husi Klibur Defisiénsia Tilun Timor Leste (KDT-TL) ne’ebé hanesan organizasaun neʼebé foka ba komunidade, lidera husi ema ho defisiénsia sira, neʼebé kompete iha Deaflympics Tokyo 2025 nian.
Nune’e, filme ne’e la’ós de’it deskreve sira-nia viajen nu’udar atleta, maibé mós espíritu inkluzaun no amizade internasionál ne’ebé buras liuhusi desportu.
Notísia relevante : ETCCC – SEKOMS lansa Filme Jesus iha lian Tetun
Diretór Ezekutivu Sentru Voluntáriu Fundasaun Nippon, Kazuto Sawatari, agradese tebes ba partisipantes sira-nia prezensa iha ezibisaun ka lansamentu filme dokumentáriu atleta defisiénsia tilun na’in-tolu nia iha Japaun.
“Deaflympics mak hanesan kompetisaun desportivu ba ema ho defisiénsia tilun, entaun kompetisaun internasionál ne’e sai viajen dahuluk Timor-Leste nia partisipasaun hodi kompete ho nasaun seluk,” Diretór Ezekutive ne’e relata iha Platinum Cineplex, Timor Plaza, Domingu ne’e.
Dirijente ne’e hatutan tan, ho jornada ne’ebé mak foun, presiza dokumenta istória viajen atleta defisiénsia tilun nian hodi prezerva sai memória no hatudu ba públiku kona-ba partisipasaun inkluziva iha nível internasionál.
“Vídeo ne’e ho ninia karakter kona-ba sentimentu, espresaun, esperiénsia, difikuldade no esperansa ne’ebé atleta sira hasoru durante semana rua iha Japaun,” nia akresenta.
Vise-Ministra Solidaridade Sosiál no Inkluzaun, Céu Brites, hateten, hanesan membru Governu nia sente kontente ba oportunidade ne’ebé Sentru Nippon fó ba atleta defisiénsia tilun na’in-tolu hodi partisipa iha kompetisaun Deaflympics Badminton, ne’ebé hala’o iha Japaun tinan 2025.
“Aktu ida-ne’e hatudu katak sira mós hola parte iha ita-nia sosiedade, nune’e ita tenke apoiu sira, aleinde ne’e mós sai oportunidade fortalese ita-nia kooperasaun bilaterál ho Japaun ba futuru ne’ebé di’ak,” Vise-Ministra subliña.
Governante ne’e dehan, entidade hotu tenke serbisu hamutuk ho di’ak liután hodi kontinua fó oportunidade ba malu, nune’e defisiénsia sira bele mellora partisipasaun iha atividade oioin.
“Agradese tebes ba Nippon ne’ebé bele halo filme dokumentária atleta sira iha Japaun, signifika ita sei hatutan istória iha timoroan sira seluk no enkoraja tan belun defisiénsia seluk ativu liután iha área desportu nian,” nia énfaze.
Kontestu husi filme ne’e maka kona-ba sira-nia formasaun, determinasaun, no esperiénsia sira iha Japaun ne’ebé grava no filme ne’e dokumenta direta husi MONJO video works, hanesan empreza produsaun filme neʼebé lokalizadu iha Dili.
Jornalista : Alexandra da Costa
Editora : Julia Chatarina
