KI apresia TATOLI, I.P laiha infrasaun durante publika produtu jornalizmu

DILI, 29 Setembru 2026 (TATOLI)—Konsellu Imprensa (KI) apresia ho Ajénsia Notisioza Timor-Leste, Institutu Públiku (TATOLI, I.P) tanba tuir monitorizasaun iha tinan ne’e seidauk hetan produtu jornalizmu ruma ne’ebé mak komete infrasaun, kompara ho tinan antes ne’e.

Apresiasaun ne’e hato’o iha audiénsia entre ekipa husi Konsellu Imprensa ho Jestór Redasaun TATOLI, I.P, ne’ebé hala’o iha Sala Sentru Formasaun, Farol, hodi pasa informasaun ba malu no halo koordenasaun serbisu.

“Buat ne’ebé ko’alia mak kona-ba liberdade imprensa no liberdade espresaun. Ita agradese tanba Konsellu Imprensa nia avaliasaun durante ne’e ba TATOLI laiha produtu ruma mak iha infrasaun, ida-ne’e ba ami sente hanesan dezafiu ida hodi mantein nafatin ami-nia knaar hanesan mídia estatál ne’ebé fó sai informasaun ba públiku ho kredível no loloos ba públiku,” Prezidente Konsellu Diretivu TATOLI, I.P, Noémio Falcão, hateten.

Nia mós agradese ba KI hanesan órgaun Estadu ne’ebé bele marka audiénsia ho TATOLI no halo diskusaun pozitivu.

“Iha enkontru ne’e ami ko’alia kona-ba interrese komún no serbisu hirak ne’ebé instituisaun rua ne’e hala’o, klaru ami ho serbisu idaidak nian, maibé serbisu ne’e haree ba buat komún ida,” nia akresenta.

Notísia relevante : CI konsidera lei kriminaliza difamasaun limite liberdade imprensa no espresaun

Iha sorin seluk, TATOLI prontu halo kolaborasaun ho KI no Sekretaria Estadu Komunikasaun Sosiál (SEKOMS) hodi selebra Loron Nasionál Liberdade Imprensa.

“Selebrasaun ba loron nasionál liberdade imprensa ne’ebé sei monu iha loron 16 Outubru, TATOLI prontu halo kolaborasaun ho Konsellu Imprensa no SEKOMS atu nune’e ita bele selebra loron ne’e ho di’ak liután,” nia tenik.

Iha fatin hanesan, Prezidente Interina KI, Suzana Cardoso, hateten, enkontru ne’e atu kria amizade entre parte rua hodi hakbesik-an ba mídia sira.

“Ami-nia mandatu atu tama ona ba tinan-rua, presiza rona opiniaun husi mídia sira hodi haree hamutuk saida mak ita atu hadi’a. Parte ida mós ami mai husu ba TATOLI atu tulun ami oinsá ita servisu hamutuk hodi selebra Loron Nasionál Liberdade Imprensa ne’ebé ita sei hala’o iha Dili,” Suzana dehan.

Prezidente Interina hatutan, ko’alia mós kona-ba oinsá iha futuru bele halo kooperasaun kona-ba kobertura ba eventu sira.

“Ami mós ko’alia oinsá iha futuru ita bele halo kooperasaun kona-ba oinsá halo kobertura ba eleisaun prezidensiál iha tinan 2027,” nia katak.

Jornalista     : Hortêncio Sanchez
Editora          : Julia Chatarina