Parlamentu aprova orsamentu privativu millaun $19,240 ba tinan 2027
DILI, 29 Setembru 2026 (TATOLI)-Parlamentu Nasionál liuhusi reuniaun plenária aprova orsamentu privativu $19.240.495 ba tinan 2027 ho votu a favór 49, kontra 0 no abstensaun tolu.
Tuir lei númeru 12/2017, loron 24 Maiu, Lei Organizasaun no Funsionamentu Administrasaun Parlamentár, iha artigu 13 alínea a) iha númeru 1, kompete ba plenária Parlamentu aprova orsamentu anuál PN.
Proposta Orsamentu ne’e sei haruka ba Governu hodi engloba iha Orsamentu Jerál Estadu (OJE) ba tinan oin nian.
Tuir relatóriu no pareser Komisaun C ba Asuntu Finansa Públika, montante poposta orsamentu privativu ne’e aloka ba saláriu no vensimentu $11.292.697, ne’ebé destina despeza $4.432.425 ba renumerasaun deputadu na’in-65 ho subsídiu sira, $2.470.874 kobre saláriu funsionáriu permanente no kontratadu 151, inklui serbisu, liuliu iha oras estraordináriu.
Aleinde ne’e, ba pesoál tékniku apoiu deputadu, prevee rihun $441 ba asesór nasionál na’in-11, $1.630.128 ba tékniku apoiu 62 no motorista deputadu 59, ba asesór internasionál presta apoiu komisaun sira prevee dotasaun rihun $732.
Relativamente ba Gabinete Prezidente Parlamentu Nasionál prevee rihun $252 ba asesór nasionál na’in-haat no tékniku na’in-rua ho xefe gabiente ida, rihun $312 ba asesór internasionál rua.
Ba sekretariadu proposta kontempla $442.800 destina ba asesór internasionál na’in-tolu no manorin-na’in língua portugeza rua, $265.200 ba asesór nasionál na’in-hitu, husi ne’e lima daudaun hala’o hela funsaun no rua prevee sei halo rekrutamentu
Verba bens no serbisu $6.470.116 hodi finansia atividade atu asegura funsionamentu regulár Parlamentu hanesan realizasaun atividade instituisionál, fiskalizasaun, formasaun no kooperasaun.
Kapitál menór $497.876 ne’ebé aloka ba akizisaun ekipamentu destina ba Rádiu Parlamentu no viatura operasionál tolu.
Verba transferénsia públika $979.806 atu apoia ba atividade bankada parlamentár, fó subvensaun ba bankada parlamentár, pagamentu kuota relativa enkontru anuál, transferénsia ba família iha kazu falesimentu no pagamentu lisensa Rádiu Parlamentu nian.
Tuir dadus husi Diresaun Jestaun Finanseira Parlamentu, ezekusaun orsamentál 2026 husi Parlamentu nian to’o iha 15 Setembru ne’e husi montante inisiál $19.073.404 no ezekuta ona $9.792.363,13 ne’ebé korresponde ba taxa globál ezekusaun 51%.
Jornalista: Nelson de Sousa
Editora: Maria Auxiliadora
