Célia Bosco reprezenta TL kompete Miss Globál Internasionál iha Tailándia
DILI, 01 Outubru 2026 (TATOLI)—Miss Globál Timor-Leste, Célia Bosco reprezenta Timor-Leste ba tuir kompetisaun Miss Global Internasionál ho nasaun 78 iha Bankok, Tailándia.
“Kandidata sira-ne’ebé partisipa ba kompetisaun Miss Globál Internasionál iha Tailándia hamutuk nasaun 78 ne’ebé mai husi Ázia no Oseania, Europa, Amérika Latina, no Áfrika,” Diretora Nasionál Miss Globál Timor-Leste, Fildiana Elisabeth, Gusmão de Oliveira hateten ba TATOLI, via Whatssap, Kinta ne’e.
Notísia relevante: Celia Bosco lori Timor-Leste nia naran kompete iha Miss Global iha Tailándia
Nia afirma horisehik loron 30 Setembru 2026, iha eventu Sash Ceremony ka Simu Sash/Selempang hakerek nasaun idaidak nian ho vestuáriu tradisionál maibé husi Timor-Leste (TL) nia vestuária tradisionál ne’ebé modifika husi estelista timoroan ne’ebé mak suporta Miss Globál Timor Leste, Célia Bosco, iha momentu ne’ebé lori Timor-Leste nia naran iha mundu.
“Ha’u Sente orgullu boot, emosaun kle’an no gratidaun ne’ebé aas tebes, bainhira haree ita-nia sidadaun hatudu nia talentu ho brani no hodi bandeira RDTL foti aas iha palku internasionál. Momentu ne’e la’ós de’it kona-ba beleza ka talentu pesoál, maibé sai hanesan afirmasaun identidade nasionál nian katak Timor-Leste riku ho kultura, istória, no dignidade ne’ebé bele kompete ho nasaun seluk iha mundu,” nia haktuir.
Diretora Nasionál Miss Globál Timor-Leste ne’e hatutan prosesu ho sakrifísiu sira hahú husi treinamentu ho dedikasaun to’o mentalidade sira-nian sura ho emosaun tanba esforsu sira-ne’e hotu foti duni fuan no mehi povu Timor-Leste nian, hodi fó motivasaun boot ba jerasaun foin-sa’e sira katak sira mós bele hamriik aas no fó ksolok ba rai-doben Timor-Leste.
Antes ne’e, Miss Globál Timor-Leste, Célia Bosco, hateten oportunidade ida-ne’e la’ós de’it kona-ba beleza maibé kona-ba responsabilidade atu lori Bandeira Timor-Leste, kultura no identidade ba mundu.
“Ha’u hakarak hatudu ba mundu katak maski ita mai husi nasaun ki’ik, ita bele iha mehi ne’ebé mak boot. Maibé, liuhusi ha’u-nia advokasia ha’u ajuda ona ema-ne’ebé mak laiha oportunidade hodi hetan asesu iha área saúde liuliu iha saúde orál. Husi ha’u-nia parte hanesan dentista maibé ha’u-nia misaun hanesan miss globál atu konekta kultura saúde no uza plataforma ida-ne’e atu kria mudansa ne’ebé mak signifikativa,” Célia tenik.
Nia dehan jornada ida-ne’e bele loke odamatan ba feto sira iha Timor-Leste ne’ebé mak iha mehi maibé seidauk hatene oinsá atu hahú. Tanba ne’e, mundu la’ós atu haree ema ida maibé haree ba nasaun Timor-Leste liuhusi povu, kultura, talentu, turizmu no sira seluk tan.
Entertantu, Miss Globál Timor-Leste, Célia Bosco, sei lori Timór-Leste nia espíritu no ninia eransa ba palku mundiál iha kompetisaun Miss Global Internationál, iha Bankok, Tailándia iha loron 29 Setembru–12 Outubru 2026.
Jornalista: Felicidade Ximenes
Editór: Xisto Freitas da Piedade
