ITA LA’O TUIR DALAN
(KUADRA (POEZIA LIÑA-HAAT) HITU[1])
Autór: Yohanes Manhitu[2]
ITA LA’O TUIR DALAN
Ema la haluha loron tuan
maski só hela iha liafuan.
Loron sei mai troka kalan.
Nafatin, ita la’o tuir dalan.
Yogyakarta, 18–02-2018
SE MOSU ABUABU KALAN
Se ó fiar metin, ó sei hetan
maski ai-tarak sira taka dalan.
Iha viajen, ó tenke tau matan,
liuliu se mosu abuabu kalan.
Yogyakarta, 19–02-2018
FURAK SEI NUNKA LAKON
Rai-kalan hahú atu hakmatek ona.
Udan la mai hodi rega, habokon.
Múzika natureza nian, ó rona.
Ninia furak sei nunka lakon.
Yogyakarta, 06–04-2018
KAKUTAK TENKE DULAS
Atu ó-nia moris bele buras,
ó-nia kakutak tenke dulas.
Selae, ó-nia ulun sei moras
no karik ó sei bele lakon ilas.
Yogyakarta, 17–04-2018
DALAN NIA ROHAN MOOS ONA
Dalan iha oin ne’e nakloke ona.
Ba laran nia lian, ha’u sei rona.
Maski ain seidauk bele kona,
dalan nia rohan moos ona.
Yogyakarta, 28–09-2018
SEI HATENE BELUN BE LOOS
Belun di’ak mak belun laran-moos.
Se nia nafatin lohi ema, nia la’ós.
Bainhira hasoru moris be toos,
ita sei hatene belun be loos.
Yogyakarta, 28–09-2018
SIRA-NIA KLAMAR LOKE DALAN
Liafuan sira mosu ona iha neon,
bele iha loron, bele iha kalan.
Poezia sai sira-nia isin-lolon.
Sira-nia klamar loke dalan.
Yogyakarta, 10–10-2018
_____________________
[1] Tuir definisaun, kuadra (naran seluk: kuartetu) mak estrofe ida-ne’ebé kompostu hosi liña haat, nu’udar parte hosi poezia ida be naruk liu ka nu’udar poezia ida tomak (obra independente). Iha kuadra ida (liuliu bainhira hamriik ketak nu’udar poezia ida), liña sira-ne’e hotu konteúdu. Entaun, nia la hanesan ho pantun (tipu poezia antigu ida-ne’ebé koñesidu tebes iha rejiaun Nusantara), ne’ebé kompostu hosi sampiran (liña introdusaun rua, nu’udar parte dahuluk) no isi (liña konteúdu rua, nu’udar parte daruak).
[2] Yohanes Manhitu ne’e poeta, hakerek-na’in, tradutór no durubasa ne’ebé hadomi lian no literatura. Nia mak hakerek Kamus Indonesia-Tetun, Tetun-Indonesia (Jakarta: PT Gramedia Pustaka Utama, 2007), Kamus Portugis-Indonesia, Indonesia-Portugis (Jakarta: PT Gramedia Pustaka Utama, 2015), A WALK AT NIGHT (Une promenade de nuit): A Collection of English and French Poems (Antuérpia: Eldonejo Libera, 2017), LIRIK SANTALUM: Kumpulan Puisi Dawan dan Tetun dengan Terjemahan Indonesia (Yogyakarta: Diandra Kreatif, 2019) no livru sira seluk (bele hetan informasaun iha ymanhitu-works.blogspot.com). Nia hela iha sidade ki’ik Ungaran (besik Semarang), Java Sentrál, Indonézia.
