Ajénsia Soshiji rekruta timoroan na’in-ualu bá serbisu iha Japaun
DILI, 27 Outubru 2026 (TATOLI) – Ajénsia Kooperativa Soshiji husi Japaun rekruta joven na’in-ualu husi Sentru Formasaun Tíbar, Sentru Formasaun Don Bosku Komoro, Sentru Formasaun Bekora no Sentru Formasaun Beasu, Vikeke, atu bá serbisu iha área konstrusaun iha Japaun.
Asesór husi Sekretaria Estadu Formasaun Profisionál no Empregu (SEFOPE), Ilídio Ximenes, hatete joven sira ne’e halo ona teste iha loron 22-23 Outubru 2026 no daudaun tuir hela kursu lia-Japaun. Sira mesak mane de’it, ne’ebé sei bá serbisu iha empreza haat ne’ebé kada empreza simu ema na’in-rua.
Empreza sira ne’ebé timorona sira ne’e sei bá serbisu mak Omura Suishin -Nagasaki, kona-ba instalasaun kanalizasaun, serbisu perfurasaun orizontál no konstrusaun sivíl, empreza Matsunaga Kensetsu-Oita, serbisu iha fatin aas, fundasaun kle’an no prevensaun rai-halai, empreza ON-Fukuoka, kona-ba pinta edifísiu no remosaun amiantu, no empreza Hoshin Kensetsu-Fukuoka, kona-ba operasaun mákina konstrusaun ba eskavasaun no serbisu auxiliár.
“Ita-nia joven na’in-ualu ne’e hetan kontratu tinan tolu bá serbisu iha Japaun. Sira daudaun tuir hela kursu lian Japaun nian, tinan oin mak bá serbisu”, Ilídio Ximenes hatete ba Tatoli via WhatsApp, ohin.
Tuir nia, ida-ne’e hatudu iha vantajen boot ba joven sira, tanba kada tinan númeru ba rekrutamentu ne’e aumenta no hahú espande ba prefecture/provínsia sira seluk hanesan Nagasaki.
“Ita hotu hatene, uluk iha deit Provínsia Kochi ho ema na’in-hitu de’it, agora hahú iha mós provínsia Nagasaki, Hiroshima, Ibarakhi, Hokaido, no sira seluk. Daudaun ne’e, ita-nia timoroan iha Japaun hamutuk 89 no iha 41 mak teste liu ona, agora tuir hela formasaun lian japonés iha Sentru Formasaun Bekora, ida-ne’e inklui na’in-ualu ne’e”, nia relata.
Tuir nia, vantajen sira seluk mak redus númeru dezempregu iha rai-laran, joven sira hetan abilidade ne’ebé di’ak no hetan osan hodi dezenvolve ekonomia família no nasaun.
Nia subliña katak ho susesu sira ne’e presiza Governu nia apoiu hodi hola mákina no materiál didátiku, rekruta profesór sira atu hanorin joven sira ho hanoin ida katak “Investe ba joven, investe ba futuru rai doben ne’e”, Ilídio Ximenes afirma.
Aleinde ne’e, iha 26 Outubru, Prezidente Ajénsia Kooperativa Soshiji, Keijiro Soshijiro Saito, hamutuk ho Diretór-Jerál SEFOPE, Carlito Cabral, halo observasaun iha área Sentru Formasaun Tíbar. Vizita ida-ne’e sei loke dalan no oportunidade boot liu atu simu joven timoroan iha área konstrusaun sivíl no agrikultura iha futuru.
Iha vizita ne’e, Soshijiro Saito dehan ekipamentu iha sentru ne’e sufisiente ona, maibé tenke aprende dalen no kultura japonés, nune’e hafásil joven sira bainhira hetan oportunidade bá serbisu iha Japaun.
Jornalista: Arminda Fonseca
Editora: Maria Auxiliadora
