DILI,09 juñu 2023 (TATOLI)—Entre abril no maiu, Ministériu Saúde (MS) rejista kazu óbitu rua. Husi númeru óbitu ne’e, abril rejista kazu ida no maiu rejista kazu ida.
Alende óbitu, durante fulan rua ne’e, MS mós rejista númeru kazu Dengue hamutuk 613.
“Iha fulan abril ita rejista kazu hamutuk 345, maiu hamutuk 268 no ita mós rejista obitu rua ne’e mai husi Dili husi ne’e afeta ba labarik idade 15 mai karaik,” Diretór Nasionál Saúde Públika, Filipe de Nerio Machado informa ba jornalista sira, bainhira partisipa iha reuniaun liña ministeriál ba preparasaun moras Rabies, iha salaun MS, Caicoli, Dili, ohin.
Notísia relevante:Frederico Bosco alerta atu kombate moras dengue presiza limpeza
Ezekutivu ne’e informa, kazu ida ne’e afetadu maioria husi Munisípiu Dili liuliu Postu Administrativu Dom Aleixo tuir mak Postu Administrativu Na’in feto.
“Kauza husi moras dengue ne’e mai husi multifaktoriál sira hanesan fatór barak mak kontribui tebes ba Dengue ne’e rasik hanesan ita hotu hatene katak superotasaun nian mudansa klimátiku agrupamentu komunidade sira iha fatin ida barak entaun ida ne’e mak kauza ne’ebé mak prodús ba insidénsia kazu dengue nian,” médiku ne’e afirma.
Notísia relevante:Frederico Bosco: Susuk iha tipu rua mak transminte moras dengue ba ema
Ida seluk, tuir Profisionál saúde ne’e mak koñesimentu ema nian kona-ba oinsá atu halo prevensaun ba iha moras dengue tanba ne’e mak Ministériu Saúde nafatin halo sensibilizasaun. Ba parte promosaun, presiza halo formasaun no advokasia ba komunidade oinsá atu halo iijene di’ak ba saúde ida idak nian.
“Agora daudaun ita reforsa nafatin prevesaun no promosaun ba iha ita-nia komunidade no ida seluk mak kontrola vetór ba iha fomigasaun no abatizasaun ba iha susuk. Maibé, kímiku sira ne’e ita sufisiente hela hodi responde ba kazu sira ne’e,” nia konklui.
Notísia relevante:MS rejista kazu dengue hamutuk 415 iha munisípiu hitu
Jornalista : Felicidade Ximenes
Editór : Rafael Ximenes de A. Belo
