OÉ-CUSSE, 11 janeiru 2024 (TATOLI) – Polísia Nasionál Timor-Leste (PNTL) liuhosi Departamentu Tránzitu no Seguransa Rodaviáriu (DTSR), fó sai katak, durante períodu tinan 2023 nian laran, servisu tránzitu sira iha munisipíu 13 inklui RAEOA rejista asidente tráfegu hamutuk 1.964, no na’in-86 lakon vida.
Notísia relevante: PNTL sei koordena DRTT regula bisikleta elétrika sirkula iha Oé-Cusse
Xefe Departamentu Tránzitu no Seguransa Rodaviáriu (DTSR), Superintendente Asistente Polísia, Luis da Costa, relata, iha ámbitu sensibiliza utilizasaun sinál tránzitu iha estrada públiku ba motorista sira iha Rejiaun Administrativa Espesiál Oé-Cusse Ambeno (RAEOA), kinta ne’e.
Nia informa, asidente hirak-ne’e akontese mai hosi fatór haat, primeiru fatór umanu, fatór veíkulu, fatór dalan no ikus maka fatór klima ka natureza.
“Ita haree iha 2023 ne’e, kazu asidente ne’e hamutuk 1.964, hosi númeru ne’e na’in-86 maka lakon sira-nia vida, sira-ne’ebé kanek todan na’in-400 no kanek kmaan iha na’in-2.333, sei ita kompara ho 2022 na’in-110 mak mate,” Luis da Costa, ko’alia iha otél Ambeno Oé-Cusse.
Nia esplika, númeru asidente kanek kmaan aas tanba dalaruma, sidadaun balu sa’e karreta ho pasajeiru barak, bainhira akontese asidente, envolve ema barak, nune’e númeru kazu bele sa’e to’o rihun.
Maibé ema sira-ne’ebé hetan asidente kanek kmaan, kanek todan no lakon vida, nia númeru ne’e diferénsa ho kazu ne’ebé rejista.
“Obstákulu ne’ebé ami tránzitu hasoru kona-bá atendimentu dezastre ka asidente iha terrenu, ida de’it, konsiénsia ema hotu nian, tanba ita laiha konsiénsia, ita hakarak dalan ne’e, ita de’it mak uza tanba via públiku ne’e, ema hotu atu uza, tantu la’o ain mós” nia katak.
Notísia relevante: PNTL rejista nain rua lakon vida hosi númeru asidente tráfegu 66 iha janeiru
Jornalista: Abílio Elo Nini
Editór: Evaristo Soares Martins
