DILI, 27 maiu 2024 (TATOLI)— Servisu Nasionál Apoiu Emerjénsia Médiku (SNAEM, I.P), entre janeiru no abríl, transfere ona pasiente iha territóriu nasionál hamutuk 5,060 hodi halo tratamentu saúde iha Hospital Nacional Guido Valadares (HNGV).
“Husi pasiente sira ne’e maioria mai husi Munisípiu Baucau, Aileu, Ermera, Ataúro no Hospitál Referénsia Maubisse, liuliu ba inan isin rua sira ne’ebé ho kondisaun kumplikadu, atu nune’e sira presiza halo tratamentu iha HNGV liuhusi Aero, Marítima no terestre,” Diretór SNAEM, I.P, Simplicio Amaral, informa ba jornalista sira bainhira partisipa loron mundiál emerjénsia nian iha salaun Larigutu CNE, Caicoli, ohin.
Diretór ne’e informa, SNAEM, I.P tempu-badak sei hatama ambulánsia 28 ba Patrimoniu Estadu, tanba kondisaun la di’ak ona.
“Totál ambulánsia iha SNAEM hamutuk 5. Husi númeru ne’e, 28 mak aat ona no 24 mak sei kobre iha munisípiu sira, maibé iha munisípiu balun ambulánsia ida-ida, tanba ne’e la sufisiente atu evakua pasiente sira ba mai iha fasilidade saúde sira,” ezekutivu ne’e hateten.
Nia afirma, roo ambulánsia ne’ebé durante evakua pasiente husi Ataúro mai HNGV, daudaun ne’e kondisaun di’ak.
“Pasiente sira ne’ebé durante roo ambulánsia evakua hosi Atauro mai Dili durante janeiru to’o abríl pasiente hamutuk 25 maioria inan isin rua, kanker, no pasiente balun mai chek up,” nia konklui.
Notísia relevante:Ró ambulánsia transfere ona pasiente 34 husi Ataúro mai HNGV
Jornalista : Felicidade Ximenes
Editór: Rafael Ximenes de A. Belo
