OEKUSI, 28 Abríl 2025 (TATOLI) – Xefe Aldeia Usapikolen, suku Bobometo, sub-rejiaun Oésilo, Leonardo Tebi, rekomenda ba Autoridade Rejiaun Administrativa Espesiál Oekusi Ambeno (RAEOA) kona-ba reabilitasaun estrada rurál kilómetru hitu iha bairru Huabanais ne’e presiza nahe ho simentu, liuliu iha área ne’ebé risku ba dezastre, inklui bee-dalan.
“Estrada ne’e atu nahee ho simentu ka aterru de’it ho rai? Kuandu aterru de’it, ami husu sei bele halo ho simentu, liuliu ba subida sira no halo mós ho bee-dalan, tanba estrada atu di’ak, presiza bee nia dalan. Se la’e udan tun, bee suli arbiru de’it, estraga dalan ne’ebé ita halo ona”, nia hato’o ámbitu diálogu abertu ho Autoridade RAEOA, iha sede suku Bobometo
Nu’udar autoridade lokál, reprezenta komunidade iha aldeia Usapikole agradese ba Governu, tanba tinan ne’e bele tau-matan atu hadi’a estrda balun.
“Ha’u agradese ba Governu, tanba iha fulan-Fevereiru foin lalais ne’e, rezolve ona ami-nia dalan, tanba aldeia Usapikolen, iha bairru Huabanais atu bá aldeia Saben nia bairru Kabun, dezde tempu okupasaun foin mak Governu tau-matan hodi hadi’a”, nia hato’o.
Notísia relevante: Autoridade RAEOA ho Lian-na’in realiza seremónia kulturál hodi reabilita estrada rurál iha Sabén
Iha fatin seluk, Martinho Liu nu’udar lia-nain husi bairru Kabun, rekomenda atu reabilita estrada tenke garante nia kualidade, tanba gasta osan boot ne’e dalan tenke di’ak. Labele hanesan estrada sira seluk, halo seidauk to’o tinan komesa aat filafali.
“Reabilitasaun estrada rurál ne’e presiza nahe ho simentu, tanba dalan husi Huabanais tama to’o Kabun atu sa’e bá Oésilo sentru kuandu tempu udan rai tahu maka’as. Kuandu reabilita mak aterru de’it ho rai, ba futuru sei hetan estragu”, nia hateten.
Diretór empreza Unipesoál Colneno Lda, Marcos Colo, informa katak progresu konstrusaun fízika estrada ne’e atinje ona 30% no sei nahee simentu iha kilometru rua.
“Serbisu agora to’o ona bairru Kabun atu tama bá Huabanais. Nia distánsia ne’e kilómetru hitu, no tuir orientasaun Prezidente Autoridade, sei fui simentu iha kilometru rua ba fatin ne’ebé subida maka’as, nune’e bele fasilita transporte sira”, nia informa.
Notísia relevante: PA RAEOA orienta empreza sira atu nahe estrada rurál ho simentu
Prezidente Autoridade RAEOA, Rogério Tiago Lobato, hateten Governu hakarak hadi’a estrada, tanba ne’e nia husu populasaun sira atu kolabora.
Notísia relevante: KAFI Oekusi aprova projetu emerjénsia 26 ho kustu millaun $36-resin
Projetu reabilitasaun ne’e ezekuta husi kompañia Colneno Unipesoál Lda ho valór kontratu rihun $621-resin. Verba ne’e autoridade RAEOA aloka iha Fundu Infraestrutura nasionál nu’udar projetu emerjénsia.
Jornalista: Abílio Elo Nini
Editora: Maria Auxiliadora
