KOVALIMA ,28 Jullu 2025 (TATOLI)– Ministériu Administrasaun Estatál (MAE) liuhusi Diresaun Jerál Simplifikasaun no Modernizasaun Admininistrasaun Lokál ho Diresaun Gerál Institutu Nasionál no Administrasaun Públika, fasilita formasaun tékniku lideransa ba Diretór Servisu Munisipál no Autoridade munisípiu 12 inklui Atauro, iha munisípiu Kovalima.
Formasaun ne’e hala’o durante loron lima, ne’ebé hahú hala’o iha loron 28 Jullu 2025, sei termina iha loron loron 1 Agostu.Formasaun ne’e kada munisípiu ida partisipa Diretór Servisu Munisipál na’in-tolu mak hanesan Diretór Servisu munisipál Obra Públika (MOP),Diretór Planu Integradu Munisipál ho Sevisu Munisipál Agua Saneamentu no Ambiente (SMAS).
“ Ita kapasita-sira, nune’e dirijente-sira foti desizaun bazeia ba regra no presiza hatudu modelu lideransa di’ak no introdús nia karakter liderasan iha atividade no kualker asuntu ne’ebé mak Diretór sira-nia kompeténsia”, Diretór Jerál Desentralizasaun no Governu Lokál MAE, António Augosto Guterres hato’o ba jornalista sira iha Salaun AMC, ohin.
Diretór Jerál ne’e dehan sai lideránsa ne’ebé di’ak mak garante boa Governasaun, direitu umanu, prodús lideransa ba futuru , lider tenke kompetente, domina área planeamentu, komprende ema-nia situasaun no bele halo jestaun.
Tanba nia afirma, lideransa la’ós sai liurai, maibé tenke hatudu nia aan hanesan motivadór, inspiradór ba nia suburdenadu sira hodi halo tratamentu ba ema hanesan ema, sai lideransa ko’alia ho liafuan ne’ebé amigavel.
“Lideransa tenke hatudu haraik-aan la’ós hatudu aan hanesan ema liurai iha tempu monarkia ema adora ita, agora la’e lideransa mak sai servidór la’ós sai fali hanesan liurai”, nia dehan.
Alende ne’e, nia husu lideransa tenke transforma nia-aan liuhusi nia hahalok, komunikasaun, la hamosu diskriminasaun la’ós atu manda, maibé guia atu la’o oinsá dudu ema ba futuru ne’ebé di’ak salva ema nia vida iha aspetu hotu.
Sekretáriu Munisipál Planeamentu no Dezenvolvimentu Integradu, Caetano dos Santos Ribeiro, reforsa katak formasaun tékniku ida-ne’e ligadu ba iha servisu dezenvolvimentu, nune’e Diretór Servisu Munisipál no Autoridade 12 inklui Atauro mak partisipa ne’ebé servisu iha área ida de’it.
“ Atividade formasaun tékniku ida-ne’e foin hala’o ba dahuluk , nune’e ita sei rona husi oradór sira tanba baibain ita ba terreñu elabora iha planu asaun anuál (PAA) ita hotu hatene ida-idak foku ba nia área “, nia informa.
Implementasaun projetu nia prioritiza mai husi aldeia no suku, tanba prosesu liuhusi reuniaun asembliea postu administrativu (Aspa) to’o iha enkontru koordenasaun konsultivu munisipál oinsá mak bele lidera.
Jornalista :Celestina Teles
Editór:Florencio Miranda Ximenes
